Canadami issittumi ilisimatusarfimmik pilersitsinissaq amigaatigineqartuarsinnartoq
Inuit Tapiriit Kanadami siulittaasorisimasaata, Mary Simonip siulittaasuunermi nalaani aallarnisaatitut pilersippaa, Inuit ilinniagaqarnissaat siunertaralugu iliuusissiaq. Tamassuma siunertaralugu, Inuit inuusuttut meeqqat atuarfiini naammassisaqarlutik ingerlaqqittarnissaat.
Meeqqat atuarfiini atuartut, 80 procentiisa atuarnertik ullumikkut naammassineq ajorpaat.
Tamassuma qaangerneqarnissaa siunertaralugu, ilinniartitaanermut iliuusissiaq aallartisariikkani inaarsarniarlugu, Mary Simonip KNR-imut oqaatigaa aamma oqarluni Issittumi Universitetimik Canadami pilersitsinissaq aallunniarlugu.
- Issittumi Universitetimi ilinniarnermi, Inuit kulturiat oqaatsillu atugaasut pingaarnertut salliutinneqarnissaat pisariaqarpoq, aatsaammi taamaaliornikkut inuusuttut imminnut tatiginerulersinneqarsinnaammata, Mary simon KNR-imut oqarpoq.
Mary Simon isumaqarpoq, Inuit inuusuttut ilikkartariaqaraat, Issittumi qaffasinnerusumik ilinniarneq, Canadap qallunaaqarfiini ilinniarnernut sanillersuunneqarsinnaammat.
Canadap Issittortaani Universiteteqalernissaq pillugu, Nunavummi Ilinniartitaanermut ministeri, Paul Quassa, Mary Simonip oqaloqatigisareerpaa. Taakku isumaqatigiissutigaat, Issittumi Universiteti Nunavummi inuusuttunut taamaallaat atuutissanngitsoq kisiannili Canadap issittortaani nanap immikkoortuini tamani inuusuttunit aamma periarfisaqarnissaat qulakkeerneqassasoq isumaqatigiissutigalugu.