Canadami inuit ilerrinik hunnorujulikkaanik nassaartoqaqqittoq

Canadap kujasissortaani nunap inoqqaavisa atuarfigiitigalugu najugaqarfigisimasaata eqqaani inuit saarnginik hunnorujulikkaanik nassaartoqaqqippoq.

Tamaani tusagassiorfiit pingasunngornermi taama allaaserisaqarput.

Meeqqat 200-t sinnerlugit saarngi Canadami nunap immikkoortuani British Columbiami sapaatit-akunneri sisamat sinnerlugit matuma siornatigut nassaarineqareersullu taama nalunaaruteqartoqarpoq.

AAMMA ATUARUK Canadami meeqqat saarngisa nassaarineqarnerat aliasutitsillunilu kammannarineqarpoq

Meeqqat qassit saarngi maanna pineqarnersut suli ilisimaneqanngilaq, nunalli immikkoortuani Saskatchewanimi nunap inoqqaavisa suliniaqatigiiffii naapertorlugit aatsaat taama amerlatigisut Canadami nassaarineqarput.

CBC Global Newsilu taama allaaserisaqarput.

Paasissutissat sukumiinerusut tusagassiortunut sisamanngornermi ullaakkut sassarnermi saqqummiunneqarumaarput.

Marieval Indian Residential Schoolimi nassaartoqarpoq. Atuarfik taanna illoqarfiup Reginap kangimut 140 kilometeritut ungasitsigisumiippoq, 1899-imiillu 1997-ip tungaanut ingerlanneqarluni.

Nunap inoqqaavisa nuna tamakkerlugu atuarfigiutigalugu najugaqarfigisimasaasa allat eqqaanni meeqqanik allanik matoorussaasoqarsimasinnaanerata misissorneqarnissaa, Canadami nunap inoqqaavisa kaammattuutigaat.

AAMMA ATUARUK Ilisimatooq: Canadami meeqqat saarngini amerlanernik nassaassaqarpoq

Meeqqat 215-it saarngi British Columbiami ineqarfigiutigalugu atuarfiup, Kamloops Indian Residential Schoolip eqqaani maajimi nassaarineqareersullu taama kaammattuuteqartoqarpoq.

Meeqqat ilaat pingasunik ukioqarlutik toqusimapput, taamatullu nassaartoqarnera Canadami nuna tamakkerlugu aalassassimaarutigineqarpoq.

Kamloops Indian Residential School 1890-imit 1978-ip tungaanut atuuppoq. Ilagiit katuullit siulliullutik aqutaraat, Canadamilu naalakkersuisut kingorna ingerlataralugu.

Canadami nunap inoqqaavisa meeraat kulturertik tunullugu, nunallu killiit kulturiannik tunuliaqutaqarlutik perorsarneqarnissaat pillugu atuarfinnut taakkununnga inissinneqartarsimapput,

Ataatsimiititaliarsuup misissuitinneqartup taamaaliortoqarnera kulturikkut toqoraanertut 2015-imi taavaa.

Atuarfiit taamaattut 130-nit ikinnerunngitsut Canadami ukiut ingerlaneranni atuussimapput, nunallu inoqqaavisa meeraartaat 150.000-t missaat atuarfinni taakkunani atuartuutigineqarsimallutik.