Canadami meeqqat saarngisa nassaarineqarnerat aliasutitsillunilu kammannarineqarpoq
Canadami British Colombiami nunap inoqqaavisa atuarfigiitigalu najugaqarfigisimasaata Kamloopsip eqqaani meeqqat 215-it saarngi nassaarineqartut Canadami TV-qarfik CTV sisamanngornermi taama tusagassiivoq.
Teknikkikkut periuseq nutaaq radari nunap iluanut takunissinnaasoq atorlugu meeqqat saarngi nassaarineqarsinnaasimapput
Suliffeqarfik Tkemplus te Secwepemc nunap inoqqaavisa suliniaqatigiiffiannit misissuinissaanik suliakkerneqarpoq, meerarpassuit tammaannaarsimasut oqaluuserineqartalernerisa kingorna.
Nutaarsiassap saqqummiuneqarnerata kingorna Canadami nunap inoqqaavi aliasupput. Naalagaaffimmi British Colombiami kisimi aliasuttoqanngilaq Canadamili sumiiffini amerlasuuni aliasupput.
Alisunnermit kamannermut
Aliasunneq kammannermut saatinneqarpoq. Meeerarpassuit pineqarsimanerat pillugit inuit kamapput.
Najugaqarfigiitigalugu atuarfimmi atuartuusimasoq nunap inoqqaavineersoq, Harvey McLeod, meeraallutik atuartuunermi nalaanni kammalaatini arlaqartut tammaraangata qimaasimasorisarsimallugit, TV-qarfimmut CTV-mut oqaluttuarpoq.
Ukiulli ingerlaneranni inuit oqaluttuanik ingerlatitseqqiisarneritsgut meeqqat taakku qimaasimanngitsut, naalliutsitaallutilli toqunneqarsimasut tusarneqartalerpoq.
Canadami sumiiffinni arlalinni 1880-1993-ip tungaanut taamaattunik najugaqarfigiitigalugit atuarfeqarpoq
Tassanilu naggueqatigiit inuit, Métisillu pinngitsaalisaallutik atuartinneqartarput. Tamaanilu meeqqat kinguaassiutitigut, tarnikkut timikkulluunniit naalliutsinneqartarsimapput, allaammi toqutaasarlutik.
Trudeau Twitterimi: attorteqqavunga
Najuqarfigiiitigalugu atuarfik Kamloops katuullit oqaluffianni canadami naalagaaffik suleqatigalugu 1890-imiit 1969 tikillugu ingerlanneqarpoq.
Maanna paavip utoqqatsernissaa piumasarineqalerpoq.
Canadami ministeriuneq Justin Trudeau attaveqatigiittarfimmi Twitterimi allappoq attortissimasorujussuulluni Canadallu oqaluttuarisaanerani ajornerpaamik aqqusaarneqarsimasunut eqqaanarluni.
Meeqqat toqusimasut 215-it atuarfiup silataanut nunap iluanut matooruneqasimasut, qaqinneqassapput kinaassusserneqarlutillu, kingornalu ilaquttaminnut tunniunneqassallutik najugaqarfissaminnulluunnit.