Ilisimatooq: Canadami meeqqat saarngini amerlanernik nassaassaqarpoq
Canadap oqaluttuarisaanerani amiilaarnartumik sapaatit akunnerata siuliani saqqummertoqarpoq.
Canadami British Colombiami nunap inoqqaavisa atuarfigiitigalugu najugaqarfigisimasaata eqqaani meeqqat 215-it saarngi nassaarineqarput.
Saarnginillu nassaartut tamaannga kilinngillat, nunammi inoqqaavisa meerarpassui tammaannarnikut timaat aamma ujaarineqassasut, ilisimatooq KNR-imut oqarpoq.
- Soorunami amiilaarnartorujorujussuuvoq.
Canadami ilisimatusarfimmi, University of Saskatchewanimi, nunat inoqqaavi nunanilu tamalaani kulturit pillugit ilisimatooq, Karla Jessen Williamson oqarpoq.
Meeqqallu saarngini nassaarneq tamaannga killinngilaq, taassumami oqarnera naapertorlugu meerarpassuit timaat suli nassaarineqarnikuunngitsut amerlaqaat:
- Artornaraluaqaaq kisianni aamma nalunngilara taakku meerannguit 215-it aallarniutaaginnartuusut. Suli 6000-it missaa suli aamma Canada tamakkerlugu paasiniaaffigineqartussaapput, taakku timai sumiinnersut.
Najuqarfigiitigalugu atuarfiup eqqaa saarnginik nassaarfiusoq katuullit oqaluffianni Canadami naalagaaffik suleqatigalugu 1890-imiit 1969 tikillugu ingerlanneqarpoq.
Ilisimatooq: misigineqaqqinngisaannassaaq
Saarngillu nassaarineqarnera kikkunnit tamanit tupaallaatigineqaraluartut, aamma qujamasuffissaqartoq, ilisimatooq oqarpoq:
- Soorunami ilaqutaasunut nunaqarfiinut nunaqqataannut, assorujorujussuaq qanorsuaq aliasunneq takkua aamma pigissagaat.
- Assut qujamasunnarpoq ilumoorlutik nassaarineqarsimammata. Tassa oqaluttuatigut ilaqutariissutsit iluanni taakkua ukiorpassuarni pigineqarsimapput, naluneqaratillu meerannguit arlalissuit ikigisassaanngitsut, atuarfimminninngaanniit utinngitsoortarsimasut.
AAMMA ATUARUK Canadami meeqqat saarngisa nassaarineqarnerat aliasutitsillunilu kammannarineqarpoq
Karla Jessen Williamson Saammaateqatigiinnissamut Isumalioqatigiissitamiit Canadami nunat inoqqaavi pillugit paasisassarsiornikuuvoq.
Canadamilu oqaluttuarisaanermi nunat inoqqaavinut alianartunik pinnittarsimanerannut, saarngit nassaarineqarnerannut uppernarsaataasoq, taanna naqissusiivoq.
- Ulluni makkunani 215-it timitarsineqarsimasut uppernarsaativittut tikkuaatigineqarsinnaapput. Qanorsuaq sakkortuumik pineqarsimanertik, oqaluttuaminnik ilumoortunik takititsisinnaasut.
