Canada suliniutinut akuutinneqalissaaq
Tamannaavorlumi piffissami sivitsulersumi Kalaallit Nunaata anguniartuarsimasaa, taama oqarpoq nunanut avannarlernut suleqatigiinnermut Naalakkersuisoq, Palle Christiansen siunnersuummik Nunat Avannarliit ministeriisa siunnersuisoqatigiiffiannut saqqummiisoq.
- Pilersaaruteqarutta suliniuteqaruttaluunniit Nunavummi, Nunavimmi imaluunniit Canadap sineriaani allami ilinniartoqarfinnik suleqatigiissutigisinnaasatsinnik, Kalaallit Nunaannit tunuliaqutissaqarluta oqarsinnaanngorunarpugut. Suleqataarusussappatalu Nunat Avannarliit suleqatigiinnerannit aningaasalersorneqarnissaanut periarfissaqarpugut, Tassa imaappoq, uagut Canadamik isumaqatigiisuteqarutta taava aningaasassaqartereerlugit piareersimassaagut, Palle Christiansen taama oqarpoq.
Atlantikup Avannaani suleqatigiiffik, Nora, Canada suleqatigalugu ataatsimoorussanik arlalinnik suliniuteqareerpoq taakkulu misilittagaat Nunat Avannarliit Siunnersuisoqatigiivinit atorluarneqarsinnaapput.
- Nora Paggivittamik New Foundlandimillu ilinniartitaaneq ilisimatusarnerlu eqqarsaatigalugit pitsaasumik suleqatereerpoq. Kisiannili nunanut Nunavuttut ittunut uagut namminersulersimanitsinnut qissimigaartunut assavut isaallugit oqarsinnaanngorpugut, nunani avannarlerni misilittagaqarpugut ilissi atorsinnaasassinnik.
Issittoq pillugu suleqatigiinnissamut malittarisassat nutaat, siornatigumut naleqqiullugit inuttaasut ineriartornissamut pitsaanerusumik periarfissiisut Siunnersuisoqatigiinnit aamma akuersissutigineqarput.
