Camp Centuryp nassuiaatigineqarnissaa Liberal Alliancep itigartikkaa
Folketingip Kalaallit Nunaannut tunngasunut ataatsimiititaliaani ullumi ataatsimiittoqareersoq, partiip Nunatsinnut tunngasunut oqaaseqartartua, Carsten Bach, KNR-imut taama oqarpoq.
- Naagga, isumaqanngilanga Kalaallit Nunaannut tunngasunut ataatsimiititaliap tungaanit tamanna Ministeriuneqarfimmut imaluunniit nunanut allanut ministereqarfimmut piumasarissagipput. Isumaqarpunga oqaluttuarisaanermi pisimasutut isigineqartariaqartoq. Tamannalu oqaluttuarisaanermik ilisimasallit immaqa misissuiffigisinnaassavaat.
AAMMA ATUARUK Lidegaardip isumaqatigiissutigineqarsimasut ilisimannginnerarpai
Folketingimi ilaasortap Inuit Ataqatigiinneersup, Aaja Chemnitz Larsenip, Camp Centurymut tunngatillugu qanoq pisoqarsimaneranik qulaajaasoqarnissaa piumasaqaatigigaluarpaa.
USA-p Camp Centurymi atomimik nukissiorfiliornissaanut imikumillu qinngornernik ulorianartunik radioaktiviusunik sermersuup iluanut aniatitsisinnaaneranut Danmarkip 1960-imi akuersissuteqarsimanera kingullertigut paasineqarpoq.
AAMMA ATUARUK IA-p Camp Centurymut suliaq qulaajartikkusukkaa
Kikkulli sunut akuersissuteqarsimanersut Carsten Bachimut apeqqutaavallaanngilaq.
- Ministeriuneqarfiup amerikamiunut isumaqatigiissutit misissuiffigisimassagai imaluunniit maanna misissuiffigigai, taamaaliornikkullu inatsisitigut pisussaaffigineqartut inississagai ilimagilluinnarpara.
- Siumut isigerusunneruvunga. Mingutsitsisoqarsimanerata ilisimaneqarnissaa pingaarnersiusinnaanissarpullu qulakkeerusuppara. Tamannaavorlu maanna naatsorsuutigisinnaasarput, Carsten Bach oqarpoq.
Camp Centurymi avatangiisinik aasaru misissuinissaq Danmarkip Namminersorlutillu Oqartussat isumaqatigiissutigisimavaat.
Camp Century pillugu suliaq ullumi oqaluuseqqinneqassaaq, ministeriunermi Folketingip Kalaallit Nunaannut tunngasunut ataatsimiititaliaanit ataatsimeeqatigineqassammat.
