IA-p Camp Centurymut suliaq qulaajartikkusukkaa

Inuit Ataqatigiit Folketingimi ilaasortaatitaata suliaq qulaajanarneqartariaqarsoraa. Paasissutissat tamakku aamma uannut nutaajupput.

KNR-ip marlunngormat oqaluttuarereeraalu Danmarkip USA 1960-imi akuerisimagaa Sermersuarmi Camp Centurymi imeq radioaktiviusoq eqqarsinnaagaa, Inuit Ataqatigiit Folketingimi ilaasortaatitaat Aaja Chemnitz Larsen taama oqarpoq.

Aaja Chemnitz Larsenip danskit naalagaaffiat - nunanut allanut tunngasunut ministeri Anders Samuelsen ilanngullugu isornartorsiorpai - Camp Century pillugu paasissutissanik isertuussisimasutut.

- Paasissutissanik isertuussisimaneq akuerineqarsinnaanngilaq. Ingammik taannarpiaq pillugu nunanut allanut tunngasunut ministeri ataatsimeeqatigeqqammillugu.

Danmark Kalaallit Nunaallu januaarimi ukioq manna isumaqatigiissuteqarput, Danmarkip nammineq akilikkaminik Camp Centurymi avatangiisinik misissuissasoq.

Aaja Chemnitz Larsenip aalajangiusimavaa Camp Centurymi sakkutooqarfinnilu allani Kalaallit Nunaanniittuni saliisoqarnissaa.

- Suliami uani iternga tikittariaqarparput. Pingaarnerli tassa unaavoq: Kalaallit Nunaanni avatangiisinik mingutsitsisimanerit tamarmik salinneqartariaqarput.

Taamaattumik Aaja Chemnitz Larsen naalakkersuisut qanoq ilillutik saliiniarnerlutik pilersaarutaannik takunissaminik piumasaqarpoq.

- Isumaqarpunga pingaaruteqartoq naalakkersuisut pisortatigoortumik Kalaallit Nunaat pillugu ataatsimiititaliami makkuninnga paasissutissiissasut: Qaqugu saliisoqarsinnaava? Minnerunngitsumillu: pingaarnersiuinermi qanoq ililluni avatangiisinik saliinissaq qulakkeerneqarniarpa? Aaja Chemintz Larsen aperivoq.

Nunanut allanut tunngasunut ministeri Anders Samuelsen USA-mut angalammat oqaaseqartissinnaasimanngilarput.

Folketingimi ilaasortap Kalaallit Nunaanneersup aappaata Aleqa Hammondip suliaq pillugu martsip aallaqqaataani ataatsimiinnissaq unnersuussutigaa.