California Eagles Minik Dahl Høegh arsartoralugu assammik arsarnermi finalemi pingaarutilimmi GSS-mut ajugaapput
Kalaaleq assammik arsartartoq Minik Dahl Høegh iligiinut amerikamiunut California Eaglesinut ilaavoq peqatigiiffikkaartumik VM-mut anngunniuttoqarmat.
Unamminerit Las Vegasimi pimmata Puerto Ricomi-mi, Mexicomi, USA-mi, Canadami Nunatsinnilu pissartat peqatigiffikkaartumik VM-mi inissaq ataaseq unammissutigaat.
Kalaallini iligiinni siullersaallutik GSS unammeqataapput finalemullu anngukkamik tassani California Eagles 37-31-mik ajorsarfigaat.
Unamminerni aallarniutaasuni California Eagles aamma GSS unammipput tassanilu California Eagles suli annertunerusumik ajugaapput.
- Maluginiarpara unamminermi siullermi pissangasorujussuusut. Taamaattoq finalemi pissanganatik arsarput ilimanarporlu nunat tamalaat unammineranni misilittagaqarnerusuugunik angusarissaarnerusimasinnaagaluartut, Minik Dahl Høegh KNR-mut oqarpoq.
Nukittussuseq aalajangiivoq
Ulluinnarni Sverigemi AMO-mi unammisartuuvoq nunanili tamalaani kattuffissuup IHFip akuersissuteqarneratigut California Eaglesinit attartorneqarpoq.
Iligiit Amerikameersut angillutik nukittupput tamannalu finalemi aalajangeeqataavoq naak GSS malinnaalluaraluartoq.
- Takuarput nukipparparujussuit atorlugit GSS semifinalemi unammisoq. Angusarissaarnerusimasinnaagunaraluarput timikkut nukittunerusimasuugunik, Minik Dahl Høegh oqarpoq.
Taanna maanna 40-leereerpoq aammalu isertuunnagu unammisartuunini inuusuttuaraanermi aallartittoq qaangiukkiartulersoq. Tamannalumi pissutaaqataavoq amerikamiunut iligiinnut peqataaneranut.
- Unammisartuujunnaarnissara qanilliartorpoq aamma assammik arsarnermi misigisassat annertuut angumerisinnaasakka ikittuaranngorput, Minik Dahl Høegh oqaluttuarpoq.
- Peqatigiiffikkaartumik VM misigissatukku ilimanarpoq una periarfissaq kingullerpaajusinnaasoq. Taamaattumik aamma neriuppugut klubbima aamma IHF-ip akueriumaaraat peqatigiiffikkaartumik VM-mut peqataasinnaanissara, Minik Dahl Høegh oqarpoq.
Kalaallit nunanut allanut unammisartut peqatigalugit 2007-mi VM-qataavoq taannalu maannamut kalaallit angutit assammik arsarnermi VM-mi peqataanerisa kingullersarigallarpaat.
