Cafémik piginnittup issiaviit nerriviillu annissupallakkai
- Nutaarsiassaq takugakku nuannaartorujussuuvunga. Issiaviit nerriviillu toqqorsiveeqqatsinniittut cafémut eqqussoqqippakka.
Krissie Winberg oqarpoq. Taassuma Nuummi cafét marluk tassa Café Esmeralda aamma Café Pascucci ingerlatarai. Taanna Sulisitsisut akunnittarfinnut, neriniartarfinnut takornariartitsinermullu ataatsimiititaliaani aamma ilaasortaavoq.
Inini issiaviit nerriviillu atorneqarsinnaasut affaannaasa atoqqusaanerat atorunnaarnera taassuma nuannaarutigaa.
AAMMA ATUARUK Siuleriiaattoqartariaaruttoq: Imerniartarfinnut isersinnaasut marloriaataat isersinnaalissasut
Assersuutigalugu Pascuccimi inuit 100-t isersimasinnaatitaapput, killilersuinerilli atuunnerata nalaanni 50-iinnaat isersimasinnaatitaapput.
- Kaaviiartitatsinnut affaannanngortitsinerup, taamaammat pingaaruteqarluinnarpoq, cafémik piginnittoq oqarpoq.
Taassuma tamanna nipilersortartunut aamma isumaqangaatsiassasoq nalilerpaa.
- Nipilersortartunummi eqqumiitsuliortunullu isiginnaariartoqarsinnaannginnera ilungersunarluinnarpoq. Assersuutigalugu Katuamut 100-nnaat isersinnaatinneqarunik taava tamanna kaaviiaartitaassaaq.
Sutorniartarfiutillit allanngortitsinissamut piareersimasut
Coronavirusi allanngortup nutaap ernumassutigineqarnera pissutigalugu Naalakkersuisunut nunatsinnut aqqummik ukiortaami matusipput.
Nunatsinnukarnissamulli piumasaqaatit sukannernerulersinneqarnerata saniatigut katerinnissamut killilersuinerit aamma qasukkarneqarput.
Assersuutigalugu nunatsinni pissartanngorniutsitsisoqarnissaa periarfissaaqqilerpoq. Tassani qanoq amerlatigisut katerissinnaaneranut malittarisassaq aamma atorunnaarsinneqarpoq.
Assersuutigalugu illup iluani inuit taamaallaat 100-t silamilu inuit 250-t katersuuteqqusaagaluarput. Killilersuinerit taaku aamma atorunnaarsinneqarput.
Taakku atorunnaarsinneqarneranni inini isersimasinnaasut affaannaaqqusaanerat killilersuinerni kiserngoruppoq.
Piumasaqaat taanna maanna aamma atorunnaarsinneqarpoq. Taamaalilluni siusinnerusumit amerlanerusunik isertitsisoqarsinnaalerluni.
- Ilumoorluinnartumik oqassaguma, siusinnerusukkut atorunnaarsinneqarsimanissaa kissaatigigaluarpara. Pingartumik sutorniartarfiuteqarnermi allannguinissamut piareersimagatta, Krissie Winberg oqarpoq.
- Killilersuileqqinnissarpummi ajornaatsuuvoq, taamaammat coronamik tunillatsissimasoqaqqilissagaluarpat nerriviit issiaviillu eqqussoqqeriaannaavagut.
Angerlarsimaannaqqusaaneq tullinnguuttoq
Nunatsinnukartunut ikinnerpaamik ulluni tallimani angerlarsimaannartussaatitaanermut aamma aneqqusaalernissamut katerissinnaaleqqinnissamullu coronamut misissortinnissamut piffissami matumani suli piumasaqaateqarpoq.
Angerlarsimaannaqqusaanermut maleruagassat
- Kalaallit Nunaannut tikikkuit ullut tallimat angerlarsimaannaqqusaavutit
- Ullut tallimassaani misissorteqqissaatit
- Angerlarsimaannaqqusaanivit nalaani pisuttuarsinnaavutit, najugaqatitit attaveqarfigisinnaavatit niuerniarsinnaallutillu
- Niuerniarninni assiaquteqarnissaq piumasaqaataavoq
- Pulaasanngilatit, pulaartoqassanngilatit, ataatsimoorfiusuniisanngilatit, bussissanngilatit, taxassanngilatit suliartornalluunniit
- Ullut tallimassaani misissortinnianngikkuit, tikinnermiit ullut 14-it angerlarsimaannassaatit.
Naalakkersuisut siulittaasuata, Múte B. Egedep (IA) nakorsaanerullu Henrik L. Hansenip oqarnerat naapertorlugit ulluni tallimani angerlarsimaannaqqusaanerup atorunnaarsinneqarsinnaalernissaanut piffissaq suli sivisusinnaavoq.
AAMMA ATUARUK Múte B. Egede takornarialerisunut: Staycation ikiorsiissutillu periarfissaraasi
18-ileereersimasut 75 procentii akiuussutissamik kapitereerpata ammaaneruleqqinnissaq misissorneqarsinnaasoq, Múte B. Egede oqarpoq. Taassuma suna tamarmi ajunngitsumik ingerlariarpat nunatta aggustimi septembarimiluunniit ammavinneqarsinnaanissaa eqqoriarpaa.
- Taama sivisutiginissaa ajorluinnarsoraara, Krissie Winberg oqarpoq.
Taassuma akiuussusersuinermi pilersaarut sukkanerutinneqartariaqarsoralugulu amerlanerusut akiuussuserneqartariaqarsorai.
- Amerlasoorujussuimmi akiuussutissamik kapitikkusunngitsut takusinnaavarput. Akiuussutissap qanoq iliortannginnera pillugu oqaluttuarnissatsinnut pikkorinnerussagunarpugut, akiuussuserneqarnissamut taamaalilluni ersisoqarpallaassanani kiisalu sukkasuumillu sooq akiuussuserneqarnissarput pingaaruteqarnersoq nassuiaatigalugu.
