Bussertartoq: Ilaasuunissaq toqqissisimananngilaq
Coronavirusi pissutigalugu Nuup ilarujussua matoqqagaluartoq illoqarfik unittuunngilaq. Illoqarfiillu pingaarnersaanni 18.000-t missaanni inoqartumi sapaatit akunnerisa naanerini inuppassuit illoqarfimmi angallattarput.
Andreas Mølgaard-Christiansen weekendimi illoqarfiup qeqqanut niuerniartunut ilaavoq, namminerisaminillu biileqannginnami pisarnini malillugu busserluni illoqarfiliarpoq. Bussernerminilu toqqissisimanngissimanini oqaluttuaraa:
- Bussini issiavinnut ingikkaangatta attuuttarpugut taavalu kiinnagut annerpaamik 50 centimeterinik ungasitsigisarlutik.
- Taanna uanga nuannarinngilara, allaannginnami aattorneqanngikkuma aattuisinnaassallunga, taanna oqarpoq.
Ilaasut issiassasut
Bussini ilaaqatini qanilliumanagit nikorfaannarusuppoq, bussimilu aquttumit ingeqquneqarpoq.
- Oqarfigaara anersa, uanga taama imminnut qanitsigisut ingiffiginavianngilakka, Andreas Mølgaard-Christiansen oqarpoq, taannalu isumaqarpoq meterinik marlunnik qaninnerusumit qanilleqqusinnginneq bussini aamma atuuttariaqaraluartoq
AAMMA ATUARUK Tamaat isigalugu: Nuummi killilersuisoqaannassasoq - sineriammili atuarfeqarfiit annikitsukkuutaartumik ammassasut
Ilaasulli ingeqquneqartarnerat pissutissaqarluarpoq. Sillimaniarneq pissutigalugu ilaasut issianissaannik piumaffigineqartartut Nuup Bussiini pisortaq nassuiaavoq.
- Aquttoq bremseriasaarsinnaasartoq ilaannilu taamaattoqaraangat inuk piareersimanngitsoq siumut kingumulluunniit ajoraluartumik uppittarami. Taanna pinaveersaarniarlugu kissaatiginartittorujussuusarparput ilaasut issianissaat, Mogens Andreas Nathansen nassuiaavoq.
Nappaalanersuaqarneranut ataatsimiititaliarsuup bussini ilaasut amerlassusaannut innersuussutaat malikkitik erseqqissaavoq.
Nakorsaaneq: Oqimaaqatigiissaarisariaqarsimavugut
Bussinik angallassinermi meterinik marlunnik qanilleqqusinnginneq sooq atuutinnginnersoq nakorsaaneq aperineqarami ima akivoq:
- Inuiaqatigiit unittooqqunagit oqimaaqatigiissaarisariaqarsimavugut. Taamaammat aarlerinartoqaraluartoq taama aalajangiisimalluta, nakorsaaneq Henrik L. Hansen ataasinngormat tusagassiortunik katersortitsinermi taama oqarpoq.
Nuummi killilersuinerit apriilip 30-at ilanngullugu atuupput.
