Bulgariami juulliaqqami neqitortoqaqqusaanngitsoq, toqoreersortatillu isumagisaraat

Nikolina Yotova-Gedionsen Nuummi kaffisorniartarfiit ilaannut Kaffivimmut iserami qorsummik qilertaasalimmik nasaqarpoq puisillu amianik sanaamik taskeqarluni, kaffisorniartarfiullu qulleerarpassui juullillu ulloriaasarpassui kusagerpasillugit qimerloorpai.

Taanna Tusassimi immikkoortortaqarfimmi aqutsisutut ukiut arfineq-pingasut matuma siorna sulilerpoq. Suliffilli kisiat piinnarlugu Bulgaria qimallugu nunatsinnut nuukkusulinngilaq. Sapaatit-akunnialuinnaami nunatsinneereerluni maanna uini taamani naapippaa.  

- Asannitsilluni susoqassanera nalunaartuaannaarpoq, aappariilerpugulli, maannalu ukiuni tallimani katisimareerpugut, taanna pilluaammisaarpasilluni oqarpoq.      

Kaffisorniartarfimmi sulisup kaffi tiilu nerrivitsinnut ilivai, Nikolina Yotova-Gedionsenillu sakikkuminit qanoq tikilluaqqusaasimatiginerini nuannaarluni oqaluttuaraa.  

Nikolina Yotova-Gedionsen ilaqutartaaminit tikilluaqquneqarluarpoq. Uani sakini peqatigalugu bulgariamiusut naatitat atorlugit nerisassiuleruttorput, taama nerisassioriaaseq taaneqartarpoq sarmi. Assi © : Privat

- Ilaqutariit Aasianni naapeqqaarakkit tikilluaqquneqarluaqalunga misigaanga. Nerrivingaatsiaq nerisassarpassualik kaajallallugu issiavugut, tamattalu nuannisaqaluta. Ilaqutariinnerminnut tikilluaqqulluangaarmannga ittoorinngilakka.  

Juullilernerani ullualuit iisinnginniarneq

Nikolina Yotova-Gedionsenip sakini Silkeborgimi Aasiannillu immikkut najugaqartut paarlakaallugit juullisioqatigisarpai. Soorunalumi kalaallisut bulgariamiusullu juullisiortarput.

- Juulli ilaqutariit ataatsimoorfigisarpaat, eqqissisimaarlutillu tunguarnitsutuuffigisarlugu. Juullip nalaani sukkulittorsinnaatitaavugut, tamanna kikkut tamarmik nalunngilaat, taanna illarluni oqarpoq nangillunilu:  

- Nerisassat eqqartortaqaakka, tassami nerineq inunnik ataatsimoortitsisarpoq!

Bulgariamiusut nerisassiat neqitaqanngitsut nerrivimmi kalaalerpaluttumik qallikkami juulliaqqami decembarip 24-ni sassaalliutaapput. Assi © : Privat

Bulgariap inuisa amerlanerpaartaat kristumiut upperluarniartuupput, taakkulu ilaatigut juulleriartornerani ullualunni iisinnginniartarput, juulliaqqamilu decembarip 24-ni neqitortoqaqqusaanngilaq. Taannalu ileqqoq Nikolina Yotova-Gedionsenip nunatsinnut nuukkami attatiinnarpaa.  

- Uima tofu usseqqaarmagu kiinaa takussagaluarpat. Allamik akunagu ussertipparput, kukkuneruvoq, taamaalioqqissanngilagullu, taanna oqarpoq nipituumillu illarluni.

Bulgariamiut juullimi nereqatigeereernermiit taqiimillutik nikuittarput, karrit ukiup tulliani oqimaannerullutik pissarsiffiunerunissaannut kissaammut ersiutigalugu.

- Toqoreersortagullu nalliuttorsioqataasinnaaqqullugit nerisatta sinneri nerrivimmiitiinnartarpagut. Erruisoqarneq ajorpoq allatulluunniit, suut tamarmik qimaannarneqartarput, taanna oqarpoq.     

Bulgariamut decembarip 25-ni nereqatigiikkaangamik aatsaat neqitortarput poortugarsiaminnillu ammaasarlutik.

Juullimi pinnersaatit akikitsut

Nikolina Yotova-Gedionsenip qaniginerpaasai ukiorpaaluit matuma siorna peerupput, taamaammallu Bulgariami ukiorpassuarni juullisiorsimanani.

- Anaanaga aanagalu peroriartorfigaakka, Kalaallit Nunaallu misiginngitsoormassuk uggoraara, taanna anersaammilluni oqarpoq.

Nunagisaminili juulleriartornerani misigisartakkani nuannersorpassuit suli eqqaamalluarpai, soorlu ilaquttanilu aningaasaatikikkaluarlutik juullerpaluttunik pinnersaasiortarnertik. Appelsiinat qalipaannik panertitanik siaartartuliat igalaat saanni tipigillutik nivingasut aamma juullip ulloriaasai qulleeraqanngitsut.     

- Bulgaria Sovjetunioniusimasumit aqunneqarnikuuvoq, taamaammat meeraaninni juullimi pinnersaatinik kusanarluinnartunik peqanngilagut. Pappilissat qillertut atorlugit juullerpaluttunik ullorialiortarpugut, qulleerartaqarnerli ajorput, taanna oqaluttuarpoq.    

Nikolina Yotova-Gedionsen juullerpaluttunik pinnersaasiornissi suli nuannarisarpaa, soorlu nissiaraliorneq.

- Meerarpassuit katersugaasivimmi juullerpaluttunik qiortaasinneqartarput – uangalu inersimasortaasarpunga, taanna illarluni oqarpoq.

Saki orpimmi peqataasartoq

Juullilernerani ukiut tamaasa niuffatitsisoqartillugu tuniniarneqartut kusagalugit taassuma qimerloortarpai, pinnersaasianilu immikkut maluginiagaqartarpoq.

- Puisip amiinik suliat nuannarisaraakka, aamma takusinnaassavat, taanna oqarpoq, taskinilu tikkuarlugu.

- Uumasoq tamaat atorneqaraangat nuannarilluinnartarpara.

Taanna ilaquttanilu Nuummi ukioq manna juullisiussapput – ileqqut tamarmik decembarip 24-ni 25-nilu inissaqartinneqassapput. Uimilu arnaa Danmarkimiissammat nissiaraliaa saqqumisinneqassaaq.  

Orpik juullerpaluttunik, soorlu nissiaqqanik sakimi Danmarkimiittup sanaavinik pinnersaatilik. Assi © : Privat

- Sakera nutaanik isumassarsiullaqqissuuvoq puisillu amii atorlugit nissiaraliortarpoq, peqataalaarniassammallu nissiaraliai orpimmut nivinngartarpagut, taanna qungujulluni oqarpoq.

Ileqqorlu ataaseq tusarsimanngisaannakkani Nikolina Yotova-Gedionsenip nunatsinnut nuukkami aatsaat paasivaa. Taannalu ileqqoq Bulgariami ikinngutiminut aamma ingerlateqqippaa.

- Poortugannanniulluni pinnguarneq nuannareqaara! Bulgariamiusut juullisioraluaraangattaluunniit taama pinnguartalernikuuvugut. Susoqarnissaata nalunartuaannarnera nuannequtaasarpoq, sorianngitsormi poortugannattaat tamarmik tammariasaarsinnaasarput, taanna illarluni oqaluttuarpoq.