BSU-mi illuutillit ikiorniarpaat
BSU-mik illuutillit illuminnik nutarterinissamut, allilerinissamut imaluunniit pitsanngorsaanissamut periarfissaat, ukiuni kingullerni sipaarniartoqarneratigut peerneqarsimagaluarpoq. Tamatumali ullutsinni periarfissaanissaa, siusinnerusumut sanilliullugu anneruvoq, nunamimi maani suliffissaaleqinerup angisuumik qaffariarneratigut inuuniarnermut aningaasartutit ajorseriaateqarsimammata, orsussap akia aamma inuussutissat akii aamma qaffakkiartuinnavimmata, Anders Olsen siunnersuummini ilaatigut taama tunngavilersuivoq.
- Inuiaqatigiinni taama inissisimasoqarneratigut aningaaserivinni attartorsinnaanermut periarfissat ajornannginnerulersimasutut oqaatigineqarsinnaanngillat, BSU-mimmi illuutillit nalinginnaasumik utoqqalinersiutiliusarput sulisartuullutilluunniit, tassa inuuniarnermi ajornartorsioreersut, Anders Olsen allappoq.
Siunnersuutaa Naalakkersuisunit ilassilluarneqarpoq.
- BSU-mit taarsigassarsillutik illuutillit, Nunatsinni najugaqartut, amerlanertigut isertitakitsuusarmata aamma aningaasaqarnikkut sukannersumik atugaqarmata, isertugaanngilaq. Taamaattumik BSU-mit taarsigassarsillutik illuutillit tapiissuteqartarnikkut illuutiminnik iluarsaassinissamut periarfissinneqarnissaat, taamaalillutillu illunik najukkaminnik pitsaanerusumik aserfallatsaaliuisinnaanissaat, Naalakkersuisut isumaqatigaat, Naalakkersuisut akissummini taama allapput.
Siunertamut tamatumunnga 2,3 millionit koruuninik 2013-imi ukiunilu tulliuttuni immikkoortitsisoqassasoq, Naalakkersuisut ilisimatitsissutigaat.
Siunnersuut aqagu marlunngornermi siullermeerlugu Inatsisartut oqaluuserissavaat.