Bruxellesip timmisartoqarfissuani pilliutigiitigalutik qaartartumeerisut qatanngutigiipput

Bruxellesip timmisartoqarfissuani ippassaq pilliutigiitigalutik qaartartumeerisut tassaapput qatanngutigiit El Bakraouikkut, taakkulu politiinit ilisimaneqareersuusut, Belgiami tv-qarfik Rtbf ilisimatitsivoq.

- Qaartartumeerisut tassaapput qatanngutigiit Khalid aamma Brahim El Bakraoui, taakkulu pinerlunniartarnertik pissutigalugu politiinit ilisimaneqareerput, tv-qarfik ilisimatitsivoq.

Qatanngutigiit taakku peqqarniisaarniarnermut siornatigut atassuserneqarsimanngillat.

Khalid ateq alla atorlugu Belgiap illoqarfiisa pingaanersaata ilaani Forestimi inissiamik attartorsimavoq, inissiamilu tassani angut sakkulisartoq politiit sapaatit-akunnerata siuliani pakasaallutik misissuineranni toqutaavoq.

Politiit misissuinerminni Islamisk Statip erfalasuanik, eqqarasuartaammik qaartitsissutinillu nassaarput. Aammattaaq ujaarineqartup Salah Abdeslamip, ullut pingasut matuma siorna tigusarineqartup, inussaminik attugai tassani nassaarineqarput.

Qaartartumeerisut kinaassusersineqarnerat paasiniaanerup pilertortumik angusaqarfiunerata inerneraa.

Timmisartoqarfissuarmi imminut pilliutigiitigaluni qaartartumeeriniat pingasuusimapput, qaartartulli marluinnaat qaartinneqarlutik. Qaartartumeeriniap qitequtaa qaartartortalik qaarsimanngitsoq Belgiamiut politiivisa nassaarivaat, angullu timmisartoqarfissuarmit qimaatilluni takuneqarsimasoq maanna ujaarineqarpoq.

Belgiamiut aviisiat DH (Derniere Heure) naapertorlugu, angut ujaarineqartoq tassaavoq 25-nik ukiulik Najim Laachraoui, siornatigut Soufiane Kayalimik imminut taagorsimasoq Parisimilu novembarip qaammataani saassusseqataasoq.

- Angutit pingajuat tassaavoq Najim Laachraoui, 25-nik ukiulik, DH allappoq nangillunilu:

- Qaartartunik pilersuisuulluni Parisimi novembarip 13-iani saassussinermut inuit 130-it toqutaaffigisaannut peqataasimassangatinneqarpoq.

Frankrigimi paasiniaasartut ilaannit tusarfik aviisimit taama issuarneqarpoq.

Laachraouisip dna-va illuni Parisimi saassussisut siorna inisimaffigisimasaanni nassaarineqarsimavoq.

Taxartitsisoq politiinut oqaluttuarpoq angutit ilaasorisimallugit, taakkulu Bruxellesip illoqarfiata ilaani Schaerbeekimi ikitissimavai nassatatillu taxartitsisumut attoqqusimanngilaat.

/ritzau/Reuters