Pølsit Deli Drengene Aps-imeersut Listeriaqarsinnaapput

Pølsit Tysklandimi pølsinik tunisassiorfimmit tunisassiarineqarsimapput, inuillu Tysklandimi marluk toqusimanerannut pissutaasimasinnaanissaat ilimagineqarluni. Inuillu allat 40-t Tysklandimi napparsimalersimanerannut aamma pissutaasorineqarput.

Pølsit pineqartut Danmarkimi Kalaallit Nunaannilu pisiniarfinni assigiinngitsuni aamma pisiarineqarsinnaasimapput.

Brugsenip Pisiffillu tamanna KNR-imut uppernarsarpaat.

- Pølsit Listeriaqarsinnaasimasut pigisimavavut, pølsit pineqartut "Koldrøget snackpølse med chili, 100 g" pisiniarfitsinni pigisimavavut. Brugsen Nuuk delikatessemut immikkoortortaqarfiani pisortap Bo Hansenip, KNR-imut uppernarsarpaa.

- Pølsilli Listeriamit eqqorneqarsimasuneersuusimagunanngillat, nalunartulli pillugit pølsit pineqartut pisiniarfitsinnit erngertumik peerpavut. Pisiniartartullu pølsinik "Deli Drengene"-meersunik pisisimasut pølsit utertikkunikkit aningaasatik tigoqqissinnaavaat, Bo Hansen, Brugsenimeersoq, oqarpoq.

Pisiffimmiillu assingusumik ilisimatitsissuteqartoqarpoq.

- Pølsit pineqartut assigiinngitsut pisiniarfitsinni pigisimavavut, Pisiffik Nuup neqaarniarfiani akisussaasoq Nikolaj Hornbek oqarpoq.

Pølsit taakku Pisiffiup aamma peersimavai, pølsillu utertikkaanni aningaasat tigoqqinneqarsinnaallutik, Nikolaj Hornbek oqarpoq.

Listeria-bakteerianit perulukkaanni assersuutigalugu utoqqaat, sanngiitsut, napparsimasut, naartusullu, toqqutigisinnaavaat. Pølsit Listeriamit eqqorneqarsimasutut mianersoqqussutigineqartut suunersut nittartakkatsinni KNR.gl-imi takuneqarsinnaapput.

Koldrøget snackpølse krydret a la Tyskland, 50 g, 100 g og 160 g

Koldrøget ølpølse krydret a la Tyskland, 500 g

Koldrøget snackpølse med chili, 100 g

Koldrøget snackpølse med delikate krydderier, 100 g og 160 g

Koldrøget snackpølse med hvidløg, 100 g og 160 g

Koldrøget snackpølse med emmentalerost, 100 g

Koldrøget ølpølse med markant smag af rød chili, 50 g og 500 g