Psykologit peqatigiiffiat: Siunersiueqateqatitsinermut aningaasat amerlanerusut atorneqarlik
Ilutigitilluguli kalaallit inooriaasaannik paasisimasaqarnissaq tarnip pissusilerisunut piumasaqaatigineqarnissaa inassutigineqarluni.
Tarnip pissusaanik ilisimasalik illoqarfimmi nunaqarfimmiluunniit kisimiilluni suligaangami artorsartinneqarpallaartaqaaq.
Tarnip pissusilerisut peqatigiiffiata Kalaallit Nunaanni immikkoortortaani siulittaasoq Karen Marie Nathansen taama oqarpoq.
- Tarnip pissusiinik ilisimasallit Kalaallit Nunaannut pileritsatsinniaraanni maaniitiinnarlugillu, taava isumagisariaqarpoq ataasiakkaarnagit arlalikkaarlugilli kommunini atorfinitsinneqartarnissaat.
Tasiilami qanittukkut sapaatip akunnerata ataatsip ingerlanerani marlunnik imminortoqarpoq ataatsimillu toqutsisoqarluni. Atorfik tarnip pissusaanik ilisimasalimmut ukiup ataatsip ingerlanerani kommunip inuttassarsiuussimagaluarpaa, qinnuteqartoqarsimanngilarli.
Karen Marie Nathansen naapertorlugu avinngarusimasunut qinnuteqartoqartannginneranut peqqutaasunut ilaavoq tamakkunani suleqatinik siunersiueqatigisassaqartanngimmat.
- Aqqutissiuussisinnaaneq pingaaruteqarpoq, tarnip pissusaanik ilisimasallip misilittagartuup ukiuni arlalinni sullissisimasup suliarisimasai qanoq nangissinnaavagut. Soorlu suliat oqimaatsut eqqarsaatigalugit. Imminut toquttut toqutsisorluunniit eqqarsaatigalugit. Tarnip pissusaanik ilisimasallit tamakkununnga suliaat annertusinnaasaqaat.
AAMMA ATUARUK Tasiilami alianartumik pisoqarnerata kingorna ikumatitalerluni ingerlaaqatigiittoqarpoq
Taamaattumik Nathansenip kommunit Namminersorlutik Oqartussallu kajumissaarpai aqqutissiuussinissamut aningaasanik amerlanernik immikkoortitseqqullugit.
- Suliat kisimiilluta suliarisavut pillugit nukillaassanngikkutta atorfitsinniiginnarlutalu aqqutissiuunneqartariaqarpugut. Tamannalu aningaasanik naleqarpoq.
Aamma kalaallit kulturiannik ilisimasaqarnissaq piumasaqaataasariaqarpoq. Tarnip pissusiinik ilisimasallit naammasserlaat aallaqqipallattarput, kalaallit inuiaqatigiit pillugit paasisimasakillutillu misilittagakittaramik.
- Pingaaruteqarpoq sullivigisassami piorsarsimassutsikkut pissutsit ilisimaarinissaat, Karen Marie Nathansen oqarpoq.
Tarnip pissusaanik ilisimasallit peqatigiiffiata Nunatsinni immikkoortortaata kommunit isumaginninnermullu naalakkersuisoq Sara Olsvig kajumissaarpai tamakku sulinermi atugaat pillugit oqaloqateqaqqullugit.
