Broberg Binkenip tikeraarnera pillugu nipaattoq: Itinerusumik sisamanngorpat oqallissaagut
Nunanut allanut tunngasunut naalakkersuisup, Pele Brobergip (N) amerikamiut nunanut allanut tunngasunut ministeriata, Antony Blinkenip Danmarkimi illoqarfiit pingaarnersaaniinnerani Københavnimi politikkikkut naapippaa.
Brobergip nuiumasoq tikeraartoq maannamut sivikitsuinnarmik naapippaa.
Nunarpulli pillugu oqallinnissaq Pele Brobergip oqarnera naapertorlugu aatsaat sisamanngorpat Naalakkersuisunut siulittaasup, Múte Bourup Egedep immikkut ittumik tikeraartitsinerani pissaaq.
AAMMA ATUARUK Pele Broberg: Blinkenip paasisariaqarpaa Danmarkiunngitsugut
Amerikamiut nunanut allanut tunngasunut ministeriat Københavnimut ullumi tikippoq. Antony Blinkenip Pele Brobergimik naapitsinermi saniatigut danskit ministeriunerat, Mette Frederiksen (S) kingornalu naalagaaffimmi annertaasoq dronning Margrethe naapippai.
Kingornatigullu nunanut allanut tunngasunut ministeri, Jeppe Kofod (S) aamma naapillugu.
Antony Blinken Issittumi Siunnersuisoqatigiit Islandimi Reykjavikkimi ataatsimiinnerannut peqataajartorluni aqagu Islandiliassaaq, angalaneratalu sivitsornerani sisamanngorpat Kangerlussuarmukassalluni.
Akunnerni tallimani Kangerlussuarmiissaaq, tassanilu Naalakkersuisut siulittaasuat, Múte B. Egede ataatsimeeqatigissallugu.
Sivikitsuinnarmik Københavnimiittoq
Pele Broberg aaqqissuussinerup assinganut peqataajartorluni aamma Reykjavikkiliariartorpoq, taamaammat Københavnimiinnera sivikitsuinnaalluni. Taamaakkaluartorli Antony Blinkenip oqaloqatiginissaanut periarfissaqarpoq.
- Nunatsinnut tunngasut nunatsinni sisamanngorpat aatsaat sammissavagut. Taamaammat massakkut naapinneranut asuli kiinnerneruvoq uagutsinniit, ilassilaaginnarneruvoq, Blinkenilu maani oqaluuserisassaqannginnatta. Aatsaat naalakkersuisut siulittaasuat Mute B. Egede ilagalugu Kangerlussuarmi oqaluuserisassagut qaqikkumaaratsigit, Pele Broberg oqarpoq.
Qaaqquneqannginneq kanngugisassaanngitsoq
Nunanut allanut tunngasunut ministeri, Jeppe Kofod Savalimmiormiullu nunanut allanut tunngasunut ministeriat Jenis av Rana Københavnimi nunanut allanut tunngasunut ministereqarfiup saani tusagassiortunik ippassaq katersortitsipput. Pele Brogerg tassani peqataanngilaq.
Sooruna tusagassiortunik ippassaq katersortitsinermi peqataanngitsutit?
- Tassa tupigilaarpara maluginiarakku ullumi arlaleriarluni tamanna eqqartorneqartoq, Pele Broberg oqarpoq.
Taassuma oqarnera naapertorlugu Kofodip av Ranallu akornanni ataatsimiinneq nunatsinnut attuumassuteqarani Savalimmiunut Danmarkimullu kisimi attuumassuteqartoq, Pele Broberg oqarpoq.
AAMMA ATUARUK Jeppe Kofod Blinkenimik Brobergimillu ataatsimeeqqateqarneq pillugu: Attaveqaqatigiilluarpugut
Taassuma oqarnera naapertorlugu nammineq katersortitsinissamut qaaqquneqanngilaq.
- Maluginiarsimavara eqqartorneqaqattaartoq danskit savalimmiormiullu tusagassiorfinnut qaaqqusinerminni uagut peqataasimanngitsugut. Taanna kisianni nalinginnaasuuvoq aamma uagut najuutinnginnatta taakku ataatsimiinneranni, Pele Broberg oqarpoq.
