Brexitimut allannguutissaq akuerineqartoq: Johnson kinguartitseqqinnissamut isumaqatigiissusiortariaqartoq

Tuluit Nunaata EU-mit ilaasortaajunnaarnissaannut tuluit inatsisartui suli aporaattuarsinnarput.

Underhusimi tuluit ministeriunerata Boris Johnsonip EU-mut avissaarnissamut isumaqatigiissutaa ullumi taasissutigineqartussaagaluarpoq, Letwinilli allannguutissatut siunnersuutaa amerlanerussuteqartunit akuerineqarmat isumaqatigiissut taasissutigineqassanngikkallarpoq.

Letwinip allannguutissatut siunnersuutaa tassaavoq Tuluit Nunaat EU-mut isumaqatigiissusioqqaarani oktobarip 31-ani anissanngitsoq. Taannalu taasissutigineqarmat 322-t amerlanerussuteqarlutik akueraat, 306-it itigartitsisut. Taamaalilluni Brexitip piviusunngornissaa inatsisartuniillu akuerineqarnissaa kinguarteqqinneqartussanngorpoq.

Boris kinguartitseqqikkusunngilaq

Allannguutissatut siunnersuutip akuerineqarneratigut brexitip aappaagumut januaarip naanissaanut kinguartinneqarnissaa Boris Johnsonip piumasarinissaanik kinguneqarpoq.

- Kinguartitsinissaq EU-mut isumaqatiginninniutiginianngilara, Johnson oqarpoq.

- Kinguartitseqqinnissaq nunatsinnut iluaqutaanngilaq. Inatsisissatut siunnersuut pisariaqartoq sapaatip akunnerata tulliani saqqummiutissavara, taassumalu oktobarip 31-ani EU-mut ilaasortaajunnaarnissarput qulakkiissavaa, taanna oqarpoq.

Illuatungiliuttuni siulittaasup Jeremy Corbynip amerlanerussuteqartut akuersinerat nuannaarutigaa.

- EU-mut isumaqatigiissuteqarani ilaasortaajunnaarnissap akuerineqanngilluinnarneranik takutitsineruvoq. Isumaqatigiissuteqarani ilaasortaajunnaarniarneq inatsisartunut ministeriunerup inatsisartunut akuersititsiniaanera pisinnaajunnaarpoq, Labourimi siuttoq oqarpoq.

AAMMA ATUARUK Johnson taaseqataasussarsiortoq

Letwinip allannguutissatut siunnersuutaata akuerineqarnerani Tuluit Nunaata EU-mit inatsisitigut isumaqatigiissusioqqaarnissaa qulakkeerpaa.

Tuluit ministeriunerata Boris Johnsonip brexitimut isumaqatigiissutaa partii konservatiivimeersup inatsisartuni ilaasortap Oliver Letwinip tapersersorlugu nutaarsiassaqartitsivik Reutersimut oqaatigaa. Allannguutissatullu siunnersuut nammineq pisuussutiginnginnerarlugu.

Isumaqatigiissusiortoqaqqaartariaqartoq

Brexit piviusunngortinnagu Tuluit Underhusimi inatsisitigut inissinneqartinnagu akuersissutigineqassanngitsoq Letwinip peqataaffigisaanut allannguutissatut siunnersuutigineqarpoq.

Siunnersuutip itigartitsissutigineqarnissaa anguniarlugu tuluit naalakkersuisuisa amerlanerussuteqartunit itigartitsissutigineqarnissaa sukataarukkaluarpaat. Tassa inatsisitigut isumaqatigiissusiunngikkaluarluni EU-mit aninissamut pilersaarut attatiinnarniarlugu.

Boris Johnsonilli iluatsinngitsoorpaa, ullumilu EU-mut isumaqatigiissuteqarnissaanut ulloq kingulliuvoq, amerlanerussuteqartullu isumaqatigiissuteqarani aninissamut akuersitissinnaanngikkunigit EU-mit ilaasortaajunnaarnissaq kinguartinneqaqqittariaqassaaq.

AAMMA ATUARUK Juncker til briterne: Slut med flere forsinkelser