Johnson taaseqataasussarsiortoq
Tuluit Nunaanni inatsisartut EU-mit ilaasortaajunnaarnissamut isumaqatigiissut Brexit aqagu arfininngornermi taasissutigisussaavaat.
Boris Johnson inatsisartuni illuatungiliuttut taaseqataanissat anguniarlugu tapersersortissarsiorpoq
Johnsonip oqaaseqartartuata nalunaarutigaa, ministeriunerup inatsisartuni ilaasortat partiinit assigiinngitsuneersut arlaqartut ullup ingerlanerani ataatsimeeqatigissagai.
AAMMA ATUARUK Juncker tulunnut: Kinguartitsinerit tassa
Inatsisartuni ilaasortat 320-t taasinermi akuerseqataanissaat Boris Johnsonip amerlanerussuteqarnissamut pisariaqartippai.
Johnsonip partiiata tassa konservatiivit inatsisartuni ilaasortaatitai 288-upput, taamaattumik amerlanerussuteqarnissamut inatsisartuni ilaasortanik taaseqataasinnaasunik pissarsiortariaqarpoq.
Siullermik inatsisartuni ilaasortat 21-t siornatigut konservatiivini ilaasortaasimasut ilaannik tapersersortissarsiussaaq.
AAMMA ATUARUK Boris Johnson: Brexit pillugu isumaqatigiissut inissippoq
Inatsisartuni ilaasortat 21-t Tuluit Nunaata EU-mik isumaqatigiissuteqaqqaarani oktoberip 31-ani ilaasortaajunnaarnissaa Boris Johnsenip suliuniuteqarnera unitsitsiniarnertik pissutigalugu konservatiivit partiivinit septemberip qaammataata aallartinnerani ilaasortaajunnaarsinneqarput.
Sky Newsip allaaserisaa naapertorlugu amerlanerusut Johnsonip isumaqatigiissutigisaanut taaseqataaniarput. Taakkunani pingasut sisamalluunnit isumaqataanatik taasiniarput.
Taakkua tapersiillutik taasiniarunik taasinerit 300-it qaangerneqassaapput, konservatiivit partiivini ilaasortat allat isumaqataanatik taasisssanngippata.
