Borgmesterit utaqqikatalereerput
-Tassa aallarniutitut una ajunngikutsuussaaq, kisianni soorunami pitsaanerpaajussangaluarpoq kommunit assigiinngitsut aamma Namminersorlutik Oqartussat sinerissami sanaartugassanut tunngasut aamma alajangeeqataaffigisalissagaluarpatigit, Qeqqata Kommuniani borgmesteri Hermann Berthelsen oqarpoq. Inuit Ataqatigiit ataatsimeersuarneranni siulersuisuunerit nalunaarutaat aallaavigalugu oqallinnermi sanaartornermut aningaasaliissutini inissialiortitsinermut tunngasut siullertut kommuninut nuunneqarsinnaaneri oqallisigineqarput.
Isuma kommuninit nutaajusorineqanngilaq, tassami kommunit aaqqissuuteqqinneqarneranni isumaliuutersuutigineqarpoq, sanaartugassanut aningaasaliissutit tamakkiisumik kommuninut nuunneqassasut, taannaavorlu kommunini borgmesterinit kissaatigineqarnerpaaq.
- Taava uagut nammineerluta pingaarnersiuinerput atorlugu, sanaartugassanut tulleriiaarisinnaanerput ingerlassinnaanngorutsigut isumaqarpunga ajunngiivissagaluartoq, Kommune Kujallermi Borgmester Simon Simonsen oqarpoq. Tamannalu Qaasuitsup Kommuniani Borgmesterimit Jess Svanemit ilalerneqarpoq.
-Sanaartorneq tamaat tunniussassatut taanna uanga pilerinartinneruara, tassa mittarfiit aamma talittarfiit aamma aningaasarsiornikkut isaatitsissutaasinnaasut taakku tunniunneqarpata uanga isumaqatigisinnaavara, Borgmester Jess Svane oqarpoq. Kommuneqarfik Sermersuumi borgmesteri Asii Chemnitz Narup inissialiortitsinermut tunngasut kommunemut nuunneqarsinnaaneri isumaqatigai, radioaviisimulli ippassaq oqarpoq
- Uanga kissaatigissavara qulaakaasoqaqqaartariaqartoq. Assersuutigalugu sumiiffimmiit sumiiffimmut sanaartugassanut akit assigiinngitsorujussuupput aammalu illuutit tuniniarneqarnerani assigiinngitsorujussuarmik akeqatitsisoqartarluni.
Sanaartornermut aningaasaliissutit, inissialiortitsinermut tunngasut tunniunneqartalissappata agguaariaaseq assortuussutaalissasoq, Borgmesterinit aarleqqutigineqarpoq
-Nalimmassaanermut tapiissutaannannguarluunniit eqqarsaatigigutsigut, kommunit sisamaasut massakkut, siusinnerusukkullu kommunit 18iusut isumaqatigiissutiginngisaannarnikuuaat, massakkut soorunami allatut siunnerfilernikuuvoq, taamaammat unaannguaq pineqassappat uanga ilimagisinnaavara assortuunneq assigiinngitsutigut qaffakkiartuaalissasoq.
