Borgmesterip pisortaq qujassuteqarfigigaa
Kommuneqarfik Sermersuumi maanna pisortaanerusup Steffen Ulrich-Lyngep Kalaallit Airportsimi pisortanngorluni atorfimminit decembarip aallaqqaataani soraartussanngorneranut atatillugu taama oqarpoq.
Steffen Ulrich-Lynge Kommuneqarfik Sermersuumi 2013-imi aasakkut pisortaaninngorpoq.
- Ukiut pingasut pissanganarsimaqaat, allaffeqarfik kommunalbestyrelsilu suleqatigiillutik annertuunik angusaqarluarsimammata, kommunimi innuttaasunut nuannaarutaasunik” Steffen Ulrich-Lynge oqarpoq.
Aamma atuaruk Steffen Ulrich-Lynge Kalaallit Airports A/S-imi pisortaaninngussaaq
Taassumalu angusimasai Asii Chemnitzip Narupip aamma nuannaarutigai, Kalaallit Airportsimilu atorfittaamini nunatta siunissaani pingaarutilerujussuarmi ingerlaqqinnissaa toqqissimanartillugu.
- Nunatsinni mittarfittaassat ullutsinni suliassat annertunersaasa ilagivaat, kommunitsinni nunatsinnilu tamarmi qaffariartornermik ineriartornermillu kinguneqartussaq, nalunngilaralu Steffen mittarfinnut attaveqaateqarnermullu tunngasunik suliaqarnissani uummateqarluarfigigaa, Asii Chemnitz Narup oqarpoq.
Aningaasaqarnermut Ataatsimiititaq pingasunngorneq novembarip aappaanni immikkut ittumik ataatsimiinnermini pisortaanerugallartussamik ivertitsissaaq. Peqatigitillugu pisortaanermik nutaamik atorfinitsitsinissamut sulineq aallartinneqassaaq.
