Steffen Ulrich-Lyngep pisortaanertut toqqarneqarneranut atatillugu Kalaallit Airports A/S-imi siulersuisuni siulittaasoq Leo Larsen ima oqarpoq:
- Steffen Ulrich-Lyngep toqqarneratigut inuk pisariaqartitatsinnik piginnaasalik mittarfiit pillugit suliniutinik angisuunik inuiaqatigiinnut kalaallinut pingaaruteqartupilussuarnut aqutsisinnaasoq nassaarivarput.
- Allaffissornikkut aqutsinikkullu akisussaaffiup Steffen Ulrich-Lyngemut tunniunnissaa toqqissimaffigilluinnarpara, taannami aqutsinikkut misilittagartuujummat, aamma Kalaallit Nunaanni mittarfeqarfinnik sanaartornermut tunngatillugu, Leo Larsen taama oqarpoq.
Steffen Ulrich-Lynge ingeniøritut ilinniagaqarpoq siornatigullu sinerissami mittarfiliortitertoqarmat sanaartornermut pisortatut atorfeqarsimalluni. Aamma Naalakkersuisoqarfimmi pisortaasimavoq kiisalu Ineqarnermut Attaveqarnermullu naalakkersuisuusimalluni.
- Sulinerma annersaani aqutsinermik Nunatsinnilu attaveqarnermik suliaqarpunga. Taamaammat suliffittaara ilassutitut isigaara maannalu suliffigisannik taamaatitsineriinnaanani. Suliniutinik pissanganartupilussuarnik aqutsineq, ineriartortitsineq piviusunngortitsinissarlu atorfimmi suliassaapput, taakkulu peqataaffiginissaat qilanaarisupilussuuara, Steffen Ulrich-Lynge tusagassiorfinnut nalunaarummi taama oqarpoq.
