Borgmesterip Facebook inerteqqutiginianngilaa
Qaasuitsup Kommuniani borgmesterip Jess Svanep Facebookip suliffiup nalaani atoqqusaajunnaarnissaannik siunnersuutaa isumaqatigiinngilaa. Tamannali oqaluuserineqartussat ilagaat kommunalbestyrelse oktobarimi ataatsimiilerpat.
- Aamma qivialaartariaqarparput silarsuaq avatatitsinni qanoq aaqqissuussaasineq. Imminnut mattutiinnarsinnaanngilagut, Jess Svane KNR-imut oqarpoq.
Internetimik atuinermut politikki Qaasuitsup Kommuniani aatsaat oqaluuserineqanngilaq tamannalu aamma oktoberimi nanginneqassaaq.
- Tusaamasaqanngilanga sulisut internetimik imaluunniit Facebook-imik atornerluisarnerannik. Aamma internetimik atuineq pillugu ersarissuni malittarisassaqarpugut tassanilu allaqqavoq nammineq inuttut iluaqutissatut atorneqassanngitsoq. Kisianni sulianut attuumassuteqarpat sulisut atorsinnaavaat aamma takusinnaasakka malillugit sulisut tamanna ajunngitsumik aquppaat, Jess Svane oqarpoq.
Kommunalbestyrelse kingullermik Aasianni ataatsimiinnermini ilisimatinneqarpoq aningaasanik atuineq unikaallatsinneqanngippat ukiup naanerani missingersuutit 15 millioner koruuninik sipporneqartussanngortut.
- Tassa imaappoq sipaarniarnissaq uani pineqanngilaq kisianni aningaasanik atuinerup kingaallatsinnissaa pineqarluni. Aamma maanna takusinnaalereerparput ilorraap tungaanut ingerlasoqartoq maanna sippueratarsinaaneq 9 millioner koruuninut apparsimavoq aallaqqaammut 15 millioner koruunimiissimagaluarluni, Jess Svane, Facebook-imi profil-eqanngitsoq, oqarpoq.
