Borgmesteri Upernavimmi utoqqaat angerlarsimaffianni elevatori pillugu: Nukiit tamaasa atorpagut
![](/sites/default/files/styles/image_934x467/public/article_images/pallejeremiassen.jpg?itok=AAuSz2T8)
Upernavimmi utoqqaat angerlarsimafianni najugaqartut arfinillit, kaassuartakkaniinnaq ingerlapput. Taakkua torsuusami qullerpaami ineeraqarput. Elevatorip ukiuni marlungajanni ajornerani anerpiarneq ajuipput.
Tamanna Utoqqaat Illersuisuata, Inga Egedep isornartorsiungaatsiarpaa. Taassuma utoqqaat illuat maajimi tikeraarpaa, taassumalu angalanermini nalunaarusiani naammassingajalerpaa.
Taassumali naliliinera ersarilluinnarpoq: Najugaqartut inuunerannik ukiuni marlunni navianartorsiortitsisoqarsimasoq, taassuma KNR-imut septembarip ulluisa tallimaanni oqaatigaa.
Taamali naliliineq akisussaanerpaap, tassa Avannaata Kommuniani borgmesterip akiuminaatsippaa.
- Ulorianartorsiorlutik inissisimanissaannik oqariartorneq taanna akiuminaatsippara, sulinermut atugassarititaasut massakkut taamaattut aaqqiiviginissaannik suliaqaratta, attaviitsoq, Palle Jerimiassen KNR-mut oqarpoq.
AAMMA ATUARUK Utoqqaat illersuisuat: Upernavimmi utoqqaat inuunerminnik navianartorsiortitaapput
KNR-ip utoqqaat illuanni elevatori pisoqaq pillugu siullermik sapaatip akunnerata siuliani saqqummiussivoq. Elevatori pisoqaangaarmat kingoraartissaanik pissarsiniarneq ajornakusoorluinnarpoq. Kingoraartissaanik maanna Italiami nassaartoqarnikuuvoq, iluarsaassisussanillu Upernavimmut oktobarip qiteqqunnerani tikittoqassaaq.
Tamanna borgmesterip innersuussutigaa - kisianni Inga Egedep oqarnera naapertorlugu utoqqaat elevatorimik taama sivikisutigisumik utaqqisussaanngikkaluarput.
Borgmesteri: Nukigut tamaasa atorpagut
Kommunilli sulisuisa nukitik tamaasa atorlugit elevatorip ingerlasaleqqissinnaanissaa ukiuni marlungajanni suliarigaat, borgmesteri oqarpoq.
- Nukigut tamaasa atorpagut najugaqartut toqqissisimallutik ernumassuteqaratillu toqqissillutik utoqqaat illuanni najugaqarnissaat qulakkeerniarlutigu. Taamaattumik suliniutigut toqqissisimaffigivaka, Palle Jerimiassen oqarpoq.
AAMMA ATUARUK Utoqqaat angerlarsimaffianni elevatori ukiuni marlunni atorsinnaanngitsoq
Taassuma ikuallattoqassagaluarpat kaassuartakkaniinnaq ingerlasut tamaasa ammukaanneqarsinnaanerat maanna akisinnaanngilaa. Tamannali kommunimi sulisuminut maanna misissortippaa.
- Qulakkeerniarlugu tamakkua suliat suleriutsillu misissortippagut, Palle Jerimiassen oqarpoq.
Utoqqaat Illuanni utoqqaat 19-it najugaqarput. Taakkunannga arfinillit kaasuartakkanik atugaqartuupput.
Utoqqaat Illersuisuata angalanermini nalunaarusiaa maanna naammassineqangajalersoq KNR-imiit pissarsiaraarput.
Utoqqaat taakku arfinillit nerinermi kisimiittarnerat kisimi ajornartorsiutaanngitsoq nalunaarusiami allassimavoq. Utoqqaat illersuisata oqarnera naapertorlugu kaasuartakkanik atuisut aaqqissuussinernut sammisaqartitsinernulluunniit isersimaartarfimmi/nerisarfimmi ineeraasa ataanniittumi pisartunut aamma peqataasinnaaneq ajorput.