Borgmesteri takornarissanut qujaannarnissaminut piareersimavoq

Nuna tamakkerlugu akitsuutit sumiiffinni ataasiakkaani illoqarfinni nunaqarfinnilu pissarsiarineqartalinngippata Avannaata Kommuniani ulluinnarlugu takornariarpassuit umiarsuarnik takornariartaatinik tikisinneqartarunnaartariaqarput.

Borgmester Palle Jeremiassen tusagassiutinut taama nalunaaruteqarpoq.

- Killissaa tikissimavarput. Periarfissagut tunngavigalugit umiarsuit taama amerlatigisut isumagisinnaanngilagut. Takornariaqarneq pisinnaasagut aallaavigalugit ineriartortittariaqarparput, aamma takornariat akileeqataasariaqarput kiffartuussinissatsinni atortulersuutit pisariaqartinneqartut pitsanngorsarnissaannut, aammalu kommunitsinni takornariartitsineq aningaasarsiutigisinnaaniassagatsigu, ullumikkutut aningaasartuutigiinnarnagu; tamannalu attatiinnarsinnaanngilarput.

Takornariat aatsaat taama amerlatigisut aasassami Kalaallit Nunaannut tikissangatinneqarmata borgmesteri taama nalunaaruteqarpoq. Umiarsuit takornariartaatit katillutik 480-it nunatsinni assigiinngitsuni tikissangatinneqarput.  

Taakkunannga 480-iusunit 100-ngajaat Avannaata Kommunianut tikissangatinneqarput.

Akitsuutit takornariaqarnermi piujuartitsinissami pingaaruteqarput

Palle Jeremiassenip oqarnera naapertorlugu umiarsuit takornariartaatit ingerlatseqatigiiffiisa Ilulissanut, Uummannamut, Upernavimmut Qaanaamullu ukioq 2022-imi tikinnerinit akitsuutit 1,7 milliunit koruunit akiliutigineqartut toqqaannartumik sumiiffinni illoqarfinnilu pissarsiarineqartariaqarput.   

- Illoqarfinni taakkunani akitsuutinit taakkunannga koruunimik ataatsimilluunniit pissarsinngilagut. Umiarsuilli tamaanga tikipput, tamannalu aningaasartuutigaarput puttasut, eqqagassalerinerit, saligaatsuutitsiniarnerit ilaalu ilanngullugit eqqarsaatigalugit. Taamaattumik allannguisoqartariaqarluinnarpoq, umiarsuarnut takornariartaatinut taama amerlatigisunut tikilluaqqusiuassagutta, borgmesteri oqarpoq.

Savalimmiuni taamaaaliortareertut, tassalu umiarsualiveqarfiit kommunillu umiarsuit akitsuutisisartut erseqqissarpaa.

Avannaata Kommuniani takornarissat 30.000-it pallillugit aasamut tikissangatinneqarput, tamaammat illoqarfiit nunaqarfiillu akitsuutinik isertassanit aamma pissarsiassaqartariaqartut Palle Jeremiasseni isumaqarpoq.

- Tamanna annertoorujussuuvoq inoqarfiit inukittunnguuneri eqqarsaatigalugit, takornariartitsinerlu piujuaannartitsinermik annertunerusumik tunngavilik qulakkeerusupparput, umiarsuarnit takornariartaatinit akitsuutiinik atuilluta talittarfinnik takornarianullu kiffartuussinermi atortulersuutinik allanik pitsanngorsaanissamut, taama Palle Jerimiassen oqarpoq.