Borgmesteri: Naajaani ikiorsiinerit pisussaaffik malillugu ingerlanneqarput
Naajaat malerujussuarnit eqqorneqarmatali upalungaarsimasut Naajaanukartinneqartut, Palle Jerimiassenip, Siumumeersup, oqaatigaa.
AAMMA ATUARUK Isigisaq sakkortuvoq
Qatserisartut nunaqarfimmukartinneqarput, aseruatiternerit tassani takusarneqarlutik.
- Innuttaasut ulluinnarni angallanniarnikkut ajutoornerat pissutigalugu umiatsianik marlunnik attartornikuuvugut pisiniarfiliarsinnaanissaat qulakkeerniarlugu, Palle Jerimiassen oqarpoq.
Umiatsiat arfinillit arfineq-marlulluunniit malerujussuarnit aseruatitertut, Naajaani innuttaasut KNR-imut oqaatigaat.
* Naajaat Upernavimmit avannamut kangisissumi 40 kilometeritut ungasitsigisumi qeqertami inissisimavoq
* 57-inik innuttaasoqarpoq illuni 20-ni najugaqarlutik
* Qaleralinniarneq pingaarnertut inuussutissarsiutaavoq
Umiatsiat arfinillit arfineq-marlulluunniit aseruatiterput
Naajaat pisiniarfeqanngimmat, umiatsiaaqqat piniutaaginnaratik aamma qallunniutaapput.
Ikiorsiissutaasinnaasut allat misissorneqarnerisa saniatigut piniutaarsertut sillimasiisarfitsigut ikiorserneqarsinnaanersut suli misissorneqartoq Palle Jerimiassen ilisimatsitsivoq.
AAMMA ATUARUK Naajaani piniartoq angallataaruttoq: Ilaqutariit tamakkerlutik umiatsiaaruttut
Aalisartup piniartullu Jørgen Petersenip sisamanngormat oqaluttuaraa qatanngutinilu pingasut malerujussuit kingunerisaannik umiatsiatik annaagaat.
Umiatsianik assigisaannillu annaasaqarsimasut pillugit kommunimit qanoq ikiorserneqarnersut borgmesteri aperaarput, akivorlu:
- Tassa massakkut misissorneqarpoq forsikringitigut qanoq inissisimasoqarnersoq, kisianni aarleqqutigivara pinngortitap kingunerisaanik ajunaartoqaraangat forsikringinik taarsiisoqarsinnaanera ajornakusoortutut inissisimagunarami, taamaattumik taanna pillugu namminersorlutik oqartussat oqaloqatigisariaqarpagut qanoq iliussanerluta.
Kielsen: Pisoq ajunaarnersuartut nalilerneqanngilaq
Naalakkersuisut siulittaasuat Kim Kielsen ippassaq tallimanngornermi oqaaseqartinniaraluaratsigu pisinnaanani nalunaarpoq. Imali ilaatigut issuarneqarumavoq:
-Pisoq politiiniit Upalungaarsimanermullu ataatsimiititaliamit ajunaarnersuartut nalilerneqanngilaq, aamma Avannaata Kommuniata suliassaq tigummigaa isumaqatigiissutaasimavoq, naalakkersuisut siulittaasuat Kim Kielsen oqarpoq.