Borgmesteri Avaaraq Olsen Tasiilaliarnianngilaq: Inissaqanngilaq
Tasiilami sapaatit akunnerisa naaneranni ulussaarsuartut sakkortutigisumik piterarpoq. Innuttaasut tupassimaqaat pigisanillu nalilinnik aseruatitertoqaqaaq.
Kommuneqarfik Sermersuumili borgmesteri, pisup kingorna Tasiilamukarnianngilaq. Taanna Nuummit kangimut inissaqannginnerarpoq.
AAMMA ATUARUK Tasiilami ajunaarnermut ikiuigasuarnissaq partiit tapersersorpaat
- Aqqutissat tamaasa misissoraluarpakka. Kulusumminngaanniit Tasiilamut umiatsiarnissamik aamma periarfissarsioraluarpugut, Inuit Ataqatigiinneersoq, Avaaraq Olsen KNR-mut oqarpoq.
Timmisartuutileqatigiiffiulli Air Greenlandip nittartagaani, Nuummit Tasiilamut ullumi marlunngornermi Kulusumi unnuinertalinnik arlalinnik inissaqarpoq. Inissap ullumi nalunaaqutaq 13.00 tallimaapput.
Borgmesteri: Atorfilittaq pingaarneruvoq
Kommuneqarfik Sermersuup borgmesteria Tasiilami inuttaasunik naapitsinani, sanaartornermut pisortap aseruatiternernik nalilersuinissaa pingaarnersiuinerani salliusoq, borgmesteri oqarpoq.
- Soorunami borgmesteritut najuunnissaq pingaaruteqartorujussuuvoq. Kisianni maannakkut pingaarnerpaatut nalilersimavarput illut aserortiternikut nalunaarsorneqarnissaat qanorlu iliuuseqarfiginissaat. Ukiuliivimmat, Avaaraq Olsen oqarpoq.
AAMMA ATUARUK Tasiilami iluarsaassineq aallartittoq: Ulapeqaagut
Taassuma sanaartornermut pisortaq, pingasunngornermi Nuummit Tasiilaliassanerarpaa. Borgmesterimmi suliarisinnaanngisai sanaartornermut pisortap piginnaasaqarfigai.
- Suut suliassaanerisa inissititernissaanut, taakkulu uanga suliarisinnaannginnakkit, borgmesteri oqarpoq.
Taassuma Tasiilami innuttaasut piterarneranik eqqugaasut piffissami qaninnerpaami tikissanerlugit akisinnaanngilaa. Borgmesterip tullia siulleq, Demokraatineersoq Justus Hansen maanna aamma Nuummiimmat Tasiilarmiut qinikkanit najorneqarnerat killeqarpoq. Avatangiisinut naalakkersuisoq, Kalistat Lund, marlunngornermi Tasiilamukassaluni KNR-mut ataasinngornermi oqarpoq.
Ulapputtut
Kommunimi upalungaarsimasunilu sulisut illoqarfimmi illut aseruatiterneri maanna iluarsaatileruttorpaat.
Piffissami sivikinnermi inuit illuisa qaliaat qallersorneqartussaassasut, siunissamili ungasinnerulaartumi iluarsaassinissanut atortussanik tunumut tikittoqarnissaa utaqqeqqaartariaqaritsik, Hjørdis Viberg ataasinngornermi oqarpoq.
- Septembarimiilereerpugut tassalu ukiussaq qanillereerput, siallertalereerluni, aammalu sapaatit akunnerat naappat sialuttalimmik anoreqassangatinneqarluni. Taamaammat iluarsaatilertortariaqarpagut, Hjørdis Viberg oqarpoq.