Borgenimi inuttaasoq danskit nersorsaasiuttagaannut innersuuneqartoq
Taanna DR-ip nangeqattaartartuliaani ”Borgen”-imi atorlittaq Emmy Rasmussen inuttaaffigaa. Nivi Pedersenilu Aasianneersoq inuttaanerminut nersornaaserneqartussat maanna innersuunneqarpoq.
Nivi Pedersen Svendborgimi filmfestivalimi nersornaasiutigineqartussamut "Svend"-prisenimut innersuunneqarpoq.
Isiginnaartartut "Svend"-prisenimut innersuussisartuupput, tassa "Svend"-prisenip nersornaatinut allanut allaanerussutaa.
Nivi Pedersen immikkoortumi "Årets håb"-imi nersornaatisisussatut innersuunneqarpoq. Nersornaat taanna filmiliornermi siunissamut neriunaateqartunut tunniunneqartarpoq.
AAMMA ATUARUK TV-kkut nangeqattaartuuliami Kalaallit Nunaat pingaarnertut inissisimassasoq
Taannalu ”Borgen”-imi inuttaasunit kisiartaalluni innersuunneqanngilaq.
Qallunaaq isiginnaartitsisartoq Mikkel Boe Følsgaard, qallunaat atorfilittaattut isiginnaagassiami nangeqattaartuliami "Borgen"-imi inuttatut angutit isiginnaartitsisartut akornanni piukkunnarnerpaatut innersuunneqarpoq. DR-ip nangeqattaartuliaa "Borgen" ukiut sisamassaat ingerlavoq, TV-kkullu nangeqattaartuliani ukioq manna nersornaatisisussatut innersuunneqarluni.
Nangeqattaartuliap "Borgen"-ip ukiut sisamassaat filmilianik internetikkut quppernermut Netfliximut tunineqarnikuuvoq. Netflix nunarsuaq tamakkerlugu 220 millioninik atuisoqarpoq.
Svend-prisen aggustip ulluisa 31-anni tunniunneqassaaq, nersornaasigassatullu innersuunneqartut internetti aqqutigalugu aggustip ulluisa 25-at ilanngullugu taasissutigineqarsinnaapput.
Ukioq manna Svend-prisenimut innersuunneqartunik uani toqqaasinnaavusi.
Siusinnerusukkut nersornaaserneqarnerit
Nivi Pedersen isiginnaartitsisartutut Malik Kleistip annilaammisaartuliaani ”Unnuap taarnerpaaffiani” siullermeertumik saqqummerpoq.
Aamma svenskit islandimiullu nangeqattaartartuliaani ”Tunn is”-imi (“Tynd is”) 2020-mi isiginnaartitseqataavoq.
AAMMA ATUARUK Hardenberg TV-kkut nangeqattaartuliap Borgenip aallakaatinneqarnissaa sioqqullugu pissangasoq
Taassumalu siumut takorluukkersaarut naatsuliaq ”Updated” 2020-mi saqqummertoq aamma piviusulersaarut ”Pilluarneq Ersigiunnaarpara” 2019-imi saqqummertoq ilitsersuiffiginikuuai. Piviusulersaarummi inuit marluk meeraanerminni atornerlugaasimasut malinnaaffigineqarput. Isiginnaagassiaq Naalakkersuisut kinguaassiutigigut naapertuilluanngitsuliortoqartarneranut akiuiniarlutik iliuusissiaata ilaanniippoq.
Nivi Pedersen nunap inoqqaavisa isiginnaagassiaanut festivalimi annerpaami imagineNATIVE-imi “Pilluarneq Ersigiunnaarpara” pillugu 2020-mi Moon Jury Awardimik nersornaaserneqarnikuuvoq, aamma Nuummi International Film Festivalertoqarnerani 2020-mi ilitsersuisutut isiginnaartitsisutullu suliaqarnerminik Innersuarmik nersornaaserneqarpoq.
