Ilisimasalik: Bitcoinip nalinga nikerartorujussuuvoq
Nunatsinnilu aningaasarsiutigiumallugu aningaasaliisimasut 600-unit ikinnerunngillat. Bitcoinilli nalinga apparpat aningaasaliissutit annaaneqaratarsinnaasut ilisimasalik oqarpoq.
Aningaasap digitaliusup Bitcoinip aningaasaliiumasut apeqqutaallutik nalinga nikerarpoq. Soqutiginnittut ikilippata nalinga appassasoq qarasaasialeriffimmi Zentura IT-mi pisortaq Christian Pedersen oqarpoq.
- Imaaliallaannaq naleerussinnaavoq, illuatungaanili aamma imaaliallaannaq aningaasarpassuanngorsinnaalluni, Christian Pedersen oqarpoq.
AAMMA ATUARUK Bitcoinit aningaasannanniutiginerat nunatsinni atugaagaluttuinnartoq
Bitcoin aningaasaavoq digitaliusoq, inuit nittartakkatigut aningaasaliiffigisinnaasaat. Aningaasatut tigussaasutut dollarisut koruunisulluunniit USA-mi Danmarkimiluunniit nalimmassarneqartartutut sunnerneqarsinnaanngillat.
Dollarit koruunillu nalingi aalaakkaasuupput, Bitcoinilli piumaneqarnera apeqqutaammat nalinga nikerartorujussuuvoq.
- Koruunit politikkikkut nalimmassarneqartarput. Politikkimi aqqutigalugu aningaasat nalingi aalajaatsumik ingerlanniarneqartarput suut tamarmik ajalusuussanngippata, Christian Pedersen oqarpoq.
Bitcoin ataaseq septembarip aallartinnerani koruuninik 29.000-inik naleqarpoq. Sapaatip akunneri marluk ingerlanerinnaani 24.000-inut appariarluni maanna 34.000 koruuninik naleqarpoq.
