Biskoppi: Apersortitsinerit immaqa kinguassapput
Coronavirus ungatitsinni nappaalatitsivoq, nunatsinnilu nappaalaleqqunata pisortat malittarisassanik sukateripput.
Assersuutigalugu Nuummi inuit qulinit amerlanerusut ataatsimooqqusaanngillat. Biskoppillu Naalakkersuisut Tunillaassortunik nappaalanersuaqarneranut ataatsimiititaliarsuup innersuussutaat tapersersorpai.
Taamaammat oqaluffinni naalagiartitsisarnerit unitsinneqarallarput. Aamma oqaluffinni pisussanik soorlu apersortitsinernik, kuisitsinernik ilisinernilluunniit kinguartitsinernik tamanna kinguneqarsinnaavoq.
AAMMA ATUARUK Biskoppi : Marsip 31-ata tungaanut oqaluffinni naalagiartitsinerit unitsinneqarput
- Immikkorluinnaq pisoqarami, coronavirus atuummat. Pisut immikkuullarissut aallaavigaagut. Taamaattumik ulluinnarni ileqqugut atorsinnaanngilagut, Sofie Petersen oqarpoq.
Taamaammat pisortat maleruaqqusaasa malinnissaat inassutigaa.
- Malittussaavagut tamatta, aamma uanga. Malinneqarnissaat innersuussutigisupilussuuara, biskoppi oqarpoq.
- Qulit annerpaamik katersuussinnaapput. Taava taamaalillutik soorlu apersortittussat arlaliusarmata, apersortitsisoqarsinnaannginnera immini ersereerpoq, biskoppi oqarpoq.
Ilisinerit
Toqusumilli ilisissagaanni, tamatumani ilaqutaasut qaninnerpaat kisimik peqataasassapput.
Illoqarfinnili toqusunut nillataartitsivilinni ilisinissap kinguartinneqarnissaa, biskopip inassutigaa.
AAMMA ATUARUK Biskop om coronafrygt i kirken: Konfirmander bør deles op i flere hold
- Ilisassaqartillugu soorunami apeqqutaavoq, aamma nillataartitsivimmik peqartoqarnersoq. Kisianni tassani innersuussutigalugu, qaninnerpaat kisimik peqataasassasut, Biskop Sofie Petersen taama oqarpoq.
Naalagiartitsinerit nalinginnaasumik unitsinneqarallaqqagaluartut innuttaasut KNR Radiokkut sapaatikkut nalliuttunilu naalagiartitsinernik aallakaateqqinneqartunik tusarnaarsinnaasassapput.
Nunatsinni palasit oqarasuaatikkut suli pissarsiarineqarsinnaasut, biskoppip, Sofie Petersenip oqaatigaa.