Biologit: Raajat ikiliartorput
- Nunatta Kitaata imartaani raajaqassuseq - tassa oqimaassusinngorlugu - malunnaatilissuarmik appariarsimavoq, pissutsillu assigiinngitsut takutippaat pitsaanngitsumik ineriartornera ukiuni qanittuni aggersuni imaaliallaannaq ilorraap tungaanut saatinneqarsinnaanaviarunanngitsut, Pinngortitaleriffik allappoq imalu nangillutik allallutik. - Taamaattumik NAFO-mi, tassa Atlantikup avannaata kitaani aalisarnikkut suleqatigiiffik, ICES-imilu, imaluunniit Nunat tamat imartaanni ilisimatusarnernut tunngatillugu siunnersuisoqatigiiffimmi, biologit innersuussutigivaat, Nunatta kitaata imartaani 60.000 tonsit 2015-imi raajartassiissutigineqartariaqaraluartut. Raajat pillugit 2013-imi 2014-imilu siunnersuinermi raajanik 80.000 tonsinik pisassiisoqartariaqaraluartoq innersuussutigineqarpoq, Pinngortitaleriffik nittartakkamini allappoq. Tunup imartaani aappaagumut raajartassiissutigineqarsinnaasutut innersuussutigineqartut siorna innersuussutigineqartunit allannguuteqaratik 2000 tonsiupput.
