Biologit aalisartut suleqatiginiaraat
Pinngortitaleriffimmiit suliniut nutaaq maanna aallartinneqarpoq, aalisartut Kalaallit Nunaata Kujataani kangerlunni aalisakkanik qalerualinnillu pisuussutinik ilisimasanik katersinissami akuutinneqassallutik. Nanortalimmi aalisartut ippassaq naapeqatigineqarput.
- Suliniutigineqartoq Nanortalimmi tallimanngornermi aallartinneqarpoq tassanilu aalisartut, aalisarnermut soqutigisaqaqatigiit piniarnermullu nakkutilliisoq ataatsimeeqatigineqarput. Ataatsimiinnermi aalisartut sumi aalisartarnerminnik, aalisakkanik sunik aalisartarnerminnik qanorlu aalisagaqartigineranik naliliinerminnik biologinut ilisimatitsinissaminnut periarfissinneqarput, Pinngortitaleriffimmiit tusagassiutitigut nalunaarummi taama allapput.
Qaleruallit pillugit misissuinermi aalisartut aamma ikiortigineqassapput, aalisartut suleqataarusut peqatigalugit uuttortaanerit ingerlanneqassallutik, taamaalilluni qaleruallit qanoq amerlatiginersut misissuiffigineqassapput.
- Suliniummi biologit namminneerlutik aamma qaleralinnik, saarullinnik, saattuanik immaqalu aamma qeeqqanik pisuussutinngorumaartussat amerlassusiat paasiniarlugu misissuissapput. Nutaatut biologit sinerissap qanittuani kilisallutik saarullinniassapput aamma aalisakkat qaleruallillu pisarineqartut tamarmik takissusii oqimaassusiilu misissorneqassapput aammalu kinguaassiorsinnaassusii misissugassanngorlugit tigooqqaavigineqassapput, Pinngortitaleriffik nalunaarpoq.
