Biilit misissorneqartalernissaat biililinnit nuannaarutigineqarpoq
Nunatsinni ukiuni kingullerni 23-nik biilinik misissuisoqanngilaq, tamanna Ineqarnermut attaveqaasersuutinullu naalakkersuisup Erik Jensenip, danskillu angallannermut ministeriat Trine Bramsen, sapaatip akunnerata siuliani isumaqatigiissutigereeraat tamanna allanngortinneqarpoq.
Danmarkimi biilit misissorneqarnissaat piffissanngungajaleraangat e-boksikkut allagarsisarput, nunatsinnili taamaaliornissamut malittarisassaqanngilaq.
Biilinik misissuisarneq nunatta suliassaqarfittut akisussaaffiginngimmagu danskit naalagaaffiat tamatumunnga inatsisinik suli aalajangersaasuuvoq.
Biilinik misissuisalernissaq, akiligassiisoqartalernissarlu pillugu KNR Nuup qeqqani inuit isumaannik tusarniaavoq,
Nuummi innuttaasut naapitatta ilaat biilinik misissuisoqartalernissaa nuannaarutigaa.
Henny Bruun: Privat
Qanoq isumaqarpit biilinik misissuisarneq nunatsinnut atuutsinneqalerniarneqarnera pillugu?
- Neriuppunga eqqutissagaat taanna, maani Kalaallit Nunaanni biilit aamma amerlasoorpassuit ingerlasinnaanngillat. Taamak Henny Bruun oqarpoq.
Namminermi biileqanngikkaluarluni biilinik paarsaqarami biilinik misissuisarneq eqqunneqalermat pissusissamisoorsorivaa.
- Uanga biileqanngilanga, maannakkut biilit paariinnarpakka, soorlu ukua biilit suliassartaqalersimanersut misissortittarput, inuttaata paarilluarpai kisianni amerlasuut maani paarineqanngillat.
-Tassa uanga ajorinngilara. soorunami biilit maaniittut aamma iluamik ingerlasariaqarput amerlasoorpassuit uneriataartarput sumulluunniit, akilertassavaat nammineq soorunalimi.
Pia Frederiksen: Foto Megan Hansen
Pia Frederiksen nammineq akisussaaffigaara
Nunatsinni biilinik misissuisalernissaq biilillip Pia Frederiksen isumassatsialaasorivaa.
Biilinik misissuisarneq nunatsinni atuutsilersinniarneqarnera qanoq isumaqarfigiviuk?
-Isumaqarpunga isumassatsialassuusoq, aamma isumaqarama biilit mingutsitsivallaarpata inuttai akiliinerusariaqartut, Pia Frederiksen oqarpoq.
Biilit isumannaatsuunissaat anguniarlugu biilinik misissuisoqartarpoq. Soorlu biilit aquutaat, unittaataat, assakaasui, qullii, kalerrisaarutaat, akisuttartui atortuisalu ilaat soorlu ajorinngujuitsui apornermillu sakkukillisitsisartui aaqqissortariaqarnersut paasiniarlugu misissorneqartarput.
Biilit pujoorfii aamma misissorneqartarput.
Biilinik misissuinermi qanoq aaqqitassaqartiginersoq misissuinermut akigitassaq aalajangerneqartarpoq. Biilimillu piginnittoq akiliisussaavoq.
Danmarkimi biilinik misissuinermut piffissaliussaq nallertinnagu biilinik misissuisitsimanngitsut 2.000 koruuninik akiliisinneqartarput.
-Uanga isumanni ajunngilaq, pissutigalugu nammineq akisussaaffigaara, aamma nammineq akisussaaffigivara biilit isumannaatsut aqussallugit, aamma immitsinnut paarisariaqaratta., Pia Frederksen oqarpoq.
Nunatsinni kingullermik 1999-mi misissuisoqarpoq, maannalu atuutsileqqinneqarnissaa Gustav Brandtip isumaqatigisorujussuullugu KNR-mut oqarpoq.
Gustav Brandt: Foto Megan Hansen
Peqqissutsimut ulorianarpoq
Qanoq isumaqarfigiviuk nunatsinni biilinik misissuisoqartalernissaa?
- Aap isumaqatigisorujussuuara ukiorparujussuit biilit misissortarunnaarnerata kingorna assigiinngitsunik iluarsisassat takunngitsoorneqartarput, soorlu immaqa uuliaqarpallaartut biilit aqqusinermiilernikuupput taakkualu aamma ulorianartorsiortitsisinnaapput peqqinnermut.
Biili ajoquteqarpat akiligassaq namminerminut tuttartussaavoq, tamanna qanoq illit isumaqarfigiviuk?
-Tassa ajorinngilluinnarpara, taamatut nammineq akiliillunga biilit misissortissagukkit, biilit Nuummi maannakkut pinngitsoorsinnaajunnaaqqavagut. Nuuk annertusiartorami suli, taamaattumik iluaqutigisorujussuusarpagut suliffitsinulluunnit aamma tunngassuteqarsinnaasarlutik.
AAMMA ATUARUK Aaja Chemnitz: Nunatsinni biilinik misissuisoqaqqittalernissaa assut qujanarpoq
Gustav Brandtilu isumalluarpoq nangillunilu:
- Iluaqutissartaqartorujussuussaaq aqquserngit aamma eqqarsaatigalugit, maannakkut Nuummi aqqusinerilernikuusagut ukiut kingullerni atoqattaaginnartakkat piulernikuupput taakkua aamma pisooqataalluinnarput biilit ukiorpassuarni paarisinnaasarluagut immaqa sivikinnerusumik pitsaassusii paarisalernikuuagut. Taakku atorluarlugit nammineerluta akiliisalerutta aamma piumasaqarsinnaalissagatta annertunerusumik, aqquserngit pitsaanerusumik ingerlanneqalernissaanut, Gustav Brandt KNR-imut oqarpoq.