Biilersinnaanermik atuagarsornikkut misilitsinnissaq utaqqinarnerulersimasoq

Biilersinnaanermik allagartartaarniarluni atuagarsornikkut misilitsinnissamik Nuummi 2017-imi utaqqinarneruleriataarsimavoq.

Folketingimut ilaasortamut Aaja Chemnitz Larsenimut akissuteqaammi tamanna atuarneqarsinnaavoq.

Kalaallit Nunaanni politiit ajornartorsiut nassuerutigaat, ukioq mannali ulapinnerusimaneq pissutaasoq, politiini atorfilittanut pisortaq nassuiaavoq.

- Tamatumalu kinguneranik utaqqineq nalinginnaasumit sivisuneruvoq, politiini atorfilittanut pisortaq, Lars Kirkegaard, oqarpoq.

Biilernermik allagartartaarniatut atuagarsorlutik politiinit misilitseqqaartarput. Tamannali pitinnagu allatsikkiartussapput, utaqqinerlu nalinginnaasumik sapaatit akunnerinik arfineq pingasunik sivisussuseqartarpoq. 

Ukioq mannali sapaatit akunneri 19-it utaqqisariaqarsimasut, danskit inatsisinut atuutsitsinermut ministeriat folketingimut ilaasortamut Aaja Chemnitz Larsenimut akissuteqarluni allappoq.

AAMMA ATUARUK Kalaallit biilernermut ilinniutaat qanganisarujussuullunilu paasiuminaatsoq

Tamannalu biilernermik Nuummi sungiusaasumut sunniuteqarpoq. Utaqqisarnerullu sivisusarnera sungiusartunut kipiluttunartoq, sungiusaasup oqaatigaa. 

- Misilitsinnissaq taamak sivisutigisumik utaqqissagunikku, taava soorunalimi puigugaqartuulaartassapput, Nuummi biilernermik sungiusaasoq, Ebbe Qvist, oqarpoq.

AAMMA ATUARUK Biilit ukiuni 18-ini misissorneqarsimanngitsut

Misilitsitsinissalli kinguaattoornerannut politiit misilitsitsisartut upernaaq manna ulapinnerusimanerat peqqutaavoq. Suliammi allarpassuit salliuttariaqarsimavaat:

- Misissueqqissaarnermik, allaffissornermik unnerluussissutissanillu piareersaanermik aamma suliassaqartaramik, Lars Kirkegaard oqarpoq.

Taamaattorli politiit Nuummi misilitsitsinissartik maanna ukkatarinerugaat, taassuma oqaatigaa:

- Utaqqisullu juullip tungaanut ikilisassavagut, politiini atorfilittanut pisortaq, Lars Kirkegaard, oqarpoq.