Bidenip biilii aporneqartut Biden ajoqusinngitsoq nalunaarutigineqartoq
USA-p præsidentiata Joe Bidenip biilii siuleriiaarlutik ingerlaaqatigiittut ilaat sapaammi aporneqarput.
Takunnittup nutaarsiassaqartitsivimmut Reutersimut tamanna oqaluttuaraa.
Bidenip nuliilu Jill Joe Bidenip præsidentimut qineqqusaarnermi allattoqarfia unnukkut nalunaaqutaq arfineq-pingasunngorsimatsiaannartoq qimappaat, Bidenip aappaagu qinigaaqqinnissaanut suleqatigisat nereqatigereerlugit allattoqarfik tassani qimallugu.
Biilit Bidenip isumannaatsuunissaa pillugu atorneqartartut ingerlaaqatigiit kinguninngua aporneqarput.
Præsidentip 40 meteritut ungasitsigisumiinnerani biilit aporneqartut nutaarsiassaqartitsiviup AFP-p allaaseraa.
Præsidenti nulialu ajunngitsut præsidentip illorsuani atorfilittat ilaata oqaatigaa.
Aporsisoq isumannaallisaanianit unguneqarpoq
Biilit aporsisut apornermi kingorna isumannaallisaanianit unguneqarput.
Præsidentip biilii aporneqarmata præsidentip paarsisui sakkutik amugaat oqaatigineqarpoq, biilinillu ingerlatsisoq tunniutiinnartoq oqaatigineqarluni.
Biilit aporneranni ajoqusertoqarsimanersoq nalunaarutigineqanngilaq, ajutoortoqarnersorli piaaraluniluunniit aporsisoqarnersoq oqaatigineqarnani.
Præsidentip paarsisui biilit apornerisa kingorna Bidenip biilii ingiaqatigigaat tv-kkut assilisat takutippaat. Nutaarsiassaqartitsivik Reuters taama allaaserisqarpoq.
Biden nulialu Delawaremi Wilmingtonimi angerlarsimaffimminnut apuutereersut nalunaarutigineqarpoq.
Naalagaaffik Delaware tassaavoq Bidenip najugaqarfia, siusinnerusukkullu præsidentimut Barack Obamamut tullersortinngunnginnermi siornatigut Delaware sinnerlugu ukiuni 36-ni senatoriulluni.
