Biden USA-p naalagaaffiini qinersinerni arlalinni ajugaassangatinneqartoq
Amerikami demokraatit præsidentinngorniunnissamut sassartitassaat, Joe Biden, pisortatigoortumik præsidentinngorniuteqataanissamik qulakkeerinnereeraluarluni, Amerikami naalagaaffinni assigiinngitsuni qinersinerit ingerlaqqipput.
Amerikami naalagaaffinni Georgiami West Virginiamilu inuit coronamut illersorniarlutik qanermikkut assiaquserlutik marlunngornermi qinersiartorput.
Qinersivinni Georgiami aama West Virginiami qinersisartut isumasiorneqarneranni paasisat naapertorlugit Joe Biden præsidentinngorniunnissamut sassartussani ajugaassussatut ilimagineqarpoq.
AAMMA ATUARUK Joe Biden præsidentinngorniunnissamut sassartussanngorpasilertoq
Joe Bidenip ajugaanissaa naatsorsuutigineqareerpoq, Amerikami præsidentimut qinersinissami novemberip qaammataani pisussami, Joe Biden demokraatit qinigassanngortitaanni kisiartaagami.
Amerikami Demokraatit præsidentinut qinigassanngortitaanni Joe Biden aprilimili præsidentimut sassartinneqartussatut ilimagineqalerpoq, qinigassanngorteqataa Bernie Sanders tunuarmat.