Bidenip Trump tv-kkut oqallinnermi nipangeqqugaa
USA-mi præsidentimut qinigaassanngortittut, Donald Trump aamma Joe Biden, TV-ikkut siullermeerlutik oqallinnerat naalagaaffimmi Ohiomi illoqarfimmi Clevelandimi pingasunngornerup unnuaani pivoq.
USA-mi covid-19, aningaasaqarneq, ammip qalipaataanik assigiinngisitsineq peqqutigalugu eqqissiviilliornerit illoqarfinnilu peqqarniisaarnerit ilaatigut eqqartorpaat.
AAMMA ATUARUK Republikanerit pissaanerup eqqissisimasumik tunniunneqarnissaa neriorsuutigigaat
TV-ikkut oqallinnermi aqutsisiup Chris Wallace oqallittut aqukkuminaatsippai. Cris Wallacip Trump arlaleriarluni nipangeqqusaraluarpaa Biden oqalunniassammmat. Nutaarsiassaqartitsivik Ritzau taama allappoq.
Kisianni Trumpip Joe Biden aamma Chris Wallace qallinnaarlugit oqaluinnartarpoq. Tamanna 77-nik ukiulimmit Joe Bidenimit ingasagineqarpoq, Taassuma Trump sianilluanngitsuunerarlugu, ammip qalipaataanik assigiinngisitsisuunerarlugu USA-milu præsidentiusimasuni ajornerpaatut taavaa, soorlu aamma oqallinermi nipangeqqusimagaa.