Republikanerit pissaanerup eqqissisimasumik tunniunneqarnissaa neriorsuutigigaat

USA-mi præsidentimut qinersisoqareerpat pissaaneq torersumik tunniunneqassasoq, amerikamiut senatianni amerlanerussuteqartut siuttuata Mitch McConnelip aalajangiusimavaa.

Taanna Twitterikkut taama allappoq.

Taassuma taama nalunaaruteqarneratigut parteeqatimi præsident Donald Trumpip oqarnera illuatungilerpaa.

USA-mi præsidentimut novembarip ulluisa pingajuanni qinersisoqarnerani Trump ajorsassagaluaruni pissaanerup ajugaasumut torersumik tunniunnaviarnagu ipppassaq sisamanngornermi oqarpoq.

- Qanoq pisoqassanersoq takujumaarparput, Trump ajorsassagaluaruni pissaaneq eqqissisimasumik tunniunneqassanersoq nutaarsiassaqartitsiviup Reutersip tusagassiortunik præsidentip illorsuani Det Hvide Husimi katersuutsitsinermi tusagassiortuata apeqqutigimmagu taama akivoq.

AAMMA ATUARUK Qarasaasianut unioqqutitsillutik saassussisut Microsoftimit paasisaasut

Naapertuilluartumik qinersisoqarsinnaanersoq Trumpip arlaleriarluni apeqqusenikuuaa. Allakkatigut qinersinerit ernumanartoqartillugit arlaleriarluni oqaatigisarnikuullugu.

USA-mi qinersisartorpassuit, coronap ajornartoortitsinera pissutigalugu allakkatigut ukioq manna qinersinissaat ilimagineqarpoq.

Trumpip taama oqarnerata kingorna republikanerinit allanit qisuariarfigineqarpoq, taakkua pissaanerup ajugaasumut eqqissisimasumik tunniunneqarnissaa tapersersorlugu oqariartuuteqarlutik.

Taakkununnga ilaapput republikaanerini senatorit Mitt Romney aamma Marco Rubio

taakkua republikanerit sinnerlugit præsidentimut siusinnerusukkut qinigassanngortinnikuupput. - Taama oqarnerat ajunaarnersuartut Trumpip taavaa.