Qarasaasianut unioqqutitsillutik saassussisut Microsoftimit paasisaasut
![](/sites/default/files/styles/image_934x467/public/article_images/img_8175.jpg?itok=YmYJo8Ak)
Russit, kinamiut iranimiullu Amerikami inuit suliniaqatigiiffiillu præsidentimut qinersinissamut attuumassuteqartut qarasaasiaannut unioqqutsitsillutik iserniarsarisimapput.
Qarasaasialeriffissuaq Microsoft tusagassiuutinut sisamanngornermi nalunaarummini taama ilisimatitsivoq.
- Nunat allamiut Amerikami præsidentimut qineqqussaarnermi sulianut qarasaasianut unioqqutitsillutik iserniarsarinertik annertusisimagaat paasivarput, Microsoft nalunaarummini allappoq.
Russit qarasaasianut unioqqutitsillutik iserniartartut, USA-mi demokraatit partiiannut 2016-mi saassusserujussuartut, Amerikamiut præsidentimut qinersinerannut maannakkut pisumut aamma saassusisuusut, Microsoft ilisimatitsivoq.
Demokraatit republikanerillu qarasaasiaat qarasaasianut unioqqutitsillutik iserniarsarisartunit saassunneqartut
Tamatumuuna demokraatit republikaanerillu taakkununngalu siunnersortit qarasaasiaannut unioqqutitsillutik iserniarsarisimapput.
Russit qarasaasianut unioqutitsillutik iserniartartuisa suliniaqatigiiffiit 200-t saassussimavaat. Amerlasuut qinersinermut toqqaannartumik toqqaannanngikkaluamilluunniit attuumassuteqartut, Microsoft ilisimatitsivoq.
Irakimiut kinamiullu qarasaasianut unioqqutitsillutik iserniartartut qassit saassussisimanersut Microsoftip nalunaarutaani ilisimatitsissutigineqanngilaq.
Kinamiulli qarasaasianut unioqqutitsillutik iserniartartui qarasaasianut, Joe Bidenip qineqqusaarneranut Donald Trumpillu allaffeqarfiani sulisimasumut tunngasunik paasissutissartalinnut isersimasut, suliffeqarfissuaq ilisimatitsivoq.