Qeqertarsuarmi teriarpassuaqarnera ajornartorsiutaasoq
-Teriarparujussuit eqqaavissuarmiipput. Unnukkut taakunngaraanni aalaaluttarpoq terissanik. Uneqqinnaarluni isiginnaaraanni imminnut maliinnarlutik ingerlaartut, sukkut tamaana puttuttaqattaartut takussaasarput, taava kiisartulerluta teriarniaratta, kiisartut sisamat imminnut ungasinngittumi inissillugit, immaqa meterit qulit iluanni inissikkatsigit, taavlu biilininngaanniit isiginnaarlugit, tulleriiaaginnangajallutik kiitittarput allaat taakku kiisartut sisamat tamarmik pisaqaraangata piiaraangakkit siluteqqinniarlugit, piiarnerinnaani suli tamakkinngikkikka aamma pisaqaqqittarlutik. Tassa taama teriaqartigaaq.
Qeqertarsuarmiu sunngiffimmilu teriarniartartoq Mark Mølgaard taama oqarpoq nangillunilu:
-Ilaanni amerlanerusuusisaramik ilaannilu ikinnerusuusisarlutik, kisianni massakkut ingasattumik amerlapput. Aatsaat taama amerlatigitillugit takuvunga. Kisianni eqqaamavara puussiarsuaq qernertoq illuarakku teriarparujuit ataanit qimarrattut, niuma akornisigut qimaasut soorlu gummikka qarsullugit. Allaat taamaattarput.
Illoqarfik tamakkerlugu ajornartorsiutaasoq
Eqqaavissuup eqqaani ineqartunut ajornartorsiutaaqaat, terissalli illoqarfiup sinneranut maanna siaruaapput.
- Nalinginnaasumik teriaqarneqa ajortumi pisaqartoqaqqammerpoq. Avannarparteriartoramik, eqqaavissuaq illoqarfiup kujataatungaaniikkami, taava malunnarpoq siaruaakkiartortut, Mark Mølgaard taama oqarpoq.
Video: Ado Isaksen og Andrea Brandt
Eqqakkanik ikuallaasarneq akuttormat, taamaattumillu terissat akornuserneqarnatik kinguaassiorujoorsinnaammata taama ajornartorsiutaatigilersimasut taassuma nalilerpaa. Ukiarsarnera nillertikkiartorneralu aamma peqqutaasinnaasorai.
Terissat nerisassanut qanillisinnaveersaarneqassasut
Uumasunut Nakorsaqarfik Inuussutissalerinermullu Oqartussaaffimmi uumasut nakorsaanera Egill Steingrimsson naapertorlugu terissat inuit peqqissusaannut akornusiisinnaanngillat, taamaakkaluartorli:
- Teriaq nerisassat akornanniissimappat, nerisassarlu nerineqarpat peqqiilliornermik kinguneqarsinnaavoq, nerisassammi bakterissanik mingutsinneqarsimasinnaapput, Egill Steingrimsson oqarpoq.
