Per Berthelsen Siumumi ilaasortaajunnaarniarpoq

Siumut sinnerlugu Kommuneqarfik Sermersuup kommunalbestyrelsiani ilaasortaajunnaartussap Per Berthelsenip parteeqatini maanna illuatungilerpai, parteeqataasami ilaat borgmesterip Siorarsiorfik pillugu suliniummut tunngatillugu nakkutilliisunit misissorneqarnissaa piumasarivaat. Siumukkormiullu ilaasa taama piumasaqarnerat pissutalluni Siumumit ingerlaannartumik tunuarniuteqarniarnini Per Berthelsenip nalunaarutigaa.
Allattoq Mads Lynge
marsip 26-at 2017 13:48

Siumummi sinnerlugu kommunalbestyrelsimi ilaasortaqataasa Ane Egede Mathæussenip Peter Davidsenillu borgmesteri Asii Chemnitz Narupip Siorarsiorfimmi suliniummut atatillugu paasissutissanik ilumuunngitsunik kommunalbestyrelsimut innuttaasunut tunniussisimasutut pasillugu nakkutilliisunit misissorneqarnissaa piumasarivaat.

Siorarsiorfimmi suliniut pillugu Kommuneqarfik Sermersuumi kommunalbestyrelsimi taasisoqarmat kommunalbestyrelsi isumaqatigiilluni taasisimasoq, Per Berthelsenip, Sermitsiaq.AG-mi allaaserisamut atatillugu oqaaseqaateqarnermini parteeqatiminut eqqaasitsissutigaa.

Tassanngaannaq apeqqusiisoqarnera quarsaarutigaa

Siorarsiorfimmi suliniut pillugu Siumut sinnerlugu kommunalbestyrelsimi oqaaseqarnermini ilaatigut apeqqusiisarsimanerarpoq, suliniullu pillugu Siumut sinnerlugu ilaasortat akornanni kingorna tamakkiisumik isumaqatigiittoqartoq eqqaasitsissutigalugu.

- Kommunalbestyrelsimi ilaasortat uattut qinersiseqanngitsigisut, uangalu ilisimanngisannik, uterpara ilisimanngisannik taama alloriarnerat quarsaarutigaara, Per Berthelsen oqaaseqaammi taama ilaatigut allaaserisaqarpoq.

Siorarsiorfimmi suliniut pillugu Siumut sinnerlugu kommunalbestyrelsimi oqaaseqarnermini ilaatigut apeqqusiisarsimanerarpoq, suliniullu pillugu Siumut sinnerlugu ilaasortat akornanni kingorna tamakkiisumik isumaqatigiittoqartoq eqqaasitsissutigalugu.

Partiip siuttuinit tatisimaneqartutut misigivoq

Siorarsiorfimmi suliniut pillugu Siumup siuttuisa apeqqusermassuk Per Berthelsenip peqataaffigisinnaannginnerarpaa, tamannalu pillugu Siumumi ilaasortaajunnaarniarnini KNR-imut nalunaarutigalugu.

Per Berthelsen, Kommuneqarfik Sermersuup kommunalbestyrelsiani, Nuuk Kommune-usimasumilu ilaasortaasimavoq, apriilillu ulluisa sisamaanni qinersisoqarnissaanut qinigassanngorteqqinnani.

Tamanna pissutigalugu Siumumit marsip ulluisa 31-anni tunuarniuteqarniarnini maanna nalunaarutigaa.

 

 

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk