NAQQIUT: Kielsenip benzinkorti pillugu suliaq uggorigaa
Oktobarip 26-ani nal. 18:00 NAQQITAQ: KNR Naalakkersuisullu siulittaasuata akornanni paatsooqatigiinneq pissutigalugu, allaaserisami oqaasertat KNR-ip allanngortippai. Allaaserisami, oktobarip 25-nal. 11.46 saqqummersumi, allappugut, Kim Kielsen benzinkortimut tunngasumik isummerusunngitsoq. Allaaserisami maanna allappugut, Kim Kielsenip pisortat pigisaannik atornerluisoqarsimammat uggorigaa.
Doris J. Jensenip benzinkortiata atornerlunneqarsimaneranik suliaq, Naalakkersuisuni ilaasortaasimasup Doris J. Jensenip tunuarniarluni nalunaaruteqarneranik sapaatit akunnerata siuliani kinguneqarpoq.
Kim Kielsenilu allakkatigut KNR-imut akissuteqaatimini allappoq Doris J, Jensenip tunuarniarluni nalunaaruteqarnera tusaatissatut tigullugu.
Benzinkortip Doris J. Jensenimut tunniunneqarsimasup, taasuma inoqutigisimasaanit allamit umiatsiamik orsiinermut atornerlunneqarsimanera kukkunersiuisut Deloittep naalakkersuisoqarfimmilu sulisut namminneq nalunaarusiaanni naqissuserneqarpoq.
Taamaammat Doris J. Jensenip benzinkortiata atornerlunneqarsimanera pillugu pisortallu aningaasaataat atornerlunneqarsimanersut, Kim Kielsen KNR-imit aperineqarpoq.
AAMMA ATUARUK Siumup naammaginanngitsumik iliuuseqarnera Dorisip tunuartariaqarneranik kinguneqarpoq
Tassungalu Kim Kielsen allakkatigut ima akivoq:
- Politikerit ataqqinnissuseqanngitsumik maniguuttumillu pisortat atugassaannut tunngassutilinnut nalinginnaasumillu inatsisitigut aalajangersakkat unioqqutinneqarsimagaangata uggorisarlugulu aliasuutigiuaannartarpara.
Kielsenip allatsini aqqutigalugu siornatigut nalunaarutigereerpaa isumaqarluni Doris J. Jensen eqqortumik iliuuseqarsimasoq.
Doris J. Jensenip benzinkortia atorneqangaatsiarsimasoq umiatsiallu orsersorneqartarfianni korti atorneqartarsimasoq, Deloittep nalunaarusiaani atornerluisimanertut taallugu saqqummiunneqarpoq.
Kukkunersiuinermut ataatsimiititaliap nalunaarutaa utaqqiniaraa
Doris J. Jensenip atuuffimmini biilia benzinamik 60 literimik taamaallaat imaqarsinnaagaluartoq orsiisarfinnit 75 literimik arlaleriarluni maqiterisoqartarsimanera, ilaatigut kukkunersiusup tupigusuutigaa.
Atornerluinerusoqarsimannginnersoq paasiniarlugu benzinasiniutissap biilinut orsiisarfinni atorneqartarsimanera pillugu qulaajaatitsiniarnersoq, KNR-ip Kim Kielsen apeqquteqarfigaa.
AAMMA ATUARUK Kukkunersiuisup atornerluineq annerusinnaasorigaa
Kim Kielsenip kukkunersiuinermut ataatsimiititaliap suliaa utaqqeqqaarniarlugu oqaatigaa:
- Tamatumunnga pissutaavoq kukkunersiuinermi ataatsimiitsitaliap pineqartoq pillugu nalilersuinini naammassiguniuk qanoq suliamut tunngatillugu ingerlariaqqittoqarnissaanik isummertussaammata, tamannalu pingaaruteqarluinnartutut isigaara, kukkunersiuinermilu suliap suli ingerlanneqarnera ataqqivara, suliarlu suli naammassinngitsoq sioqqutsillunga oqaaseqarnissara kissaatiginngilara. Tassaavorlu aamma Inatsisartut suleriaasiat - taannaavorlu malikkusutara. KNR-mut tamanna aamma siornatigut erseqqissaatigereernikuuara, Kim Kielsen KNR-imut mailikkut allakkamini taama akivoq.
