Bent Sørensen Aalisarneq pillugu Siunnersuisooqatigiinni siulittaasunngorpoq
Siulittaasuujunnaartoq Petrus Biilmann KNAPK-meersoq Aalisarneq pillugu Siunnersuisooqatigiinni, ukiuni aggersuni annertuunik suliassaqarfiusumi, siulittaasup tullinngorpoq.
-Aalisarneq pillugu inatsisip immikkoortua siulleq naammassereerparput, susassaqarfimmilu unamminartut annertuut siunissami suliarineqartussaapput. Siullertulli kinguaariit nikinneri siunissami qanittumi pisussat isumagisariaqarpagut. Tamatuma saniatigut aamma siunnersuisooqatigiinnut ilaasortat tamaasa tusaaneqarnissaat qulakkiissavarput, ilaasortallu isumassarsiaat eqqarsaataallu ingerlateqqillutigit, Bent Sørensen knr.gl-imut oqarpoq.
Aalisarneq pillugu Siunnersuisooqatigiinni nunatsinni aalisartunut tamanut atuuttuuvoq, angallatinili angisuuni aalisartut umiatsiaararsortullu uummammiorisartagaat assigiinngitsupilussuusinnaasarput.
-Aalisarneq pillugu Siunnersuisooqatigiit nunatsinni aalisartunut tamanut atuuttuuvoq, unamminartullu assigiinngitsuuneri ilaatigut ersertarpoq, qanoq ittumik angallateqarneq sunillu aalisarneq apeqqutaatillugu. Pingaarnertut suliassaraarput atituumik isiginninnissaq assigiimmillu tunniussinissaq, Bent Sørensen isumaqarpoq, taannalu isumaqarpoq naalakkersuisunik suleqateqarneq pitsaasuusoq, naak tamatigut isumaqatigiittoqartanngikkaluartoq.
