Piujuartitsineq innarliinngitsunillu inuussutissarsiuteqarneq Arctic Circlemi oqaluuserineqartut

Issittoq pillugu oqaloqatigiinnissamut attaveqatigiiffik Islandimi illoqarfiup pingaarnersaani Reykjavíkimi sapaatiuppat tungaanut ataatsimiissapput.

Tassami issittoq pillugu oqaloqatigiinnissamut attaveqaammi ilaasortat maanna illoqarfiup pingaarnersaanni katersuussimapput.

Ulluni tulliuttuni EU-p Issittumi periusissiani saqqummiuttussaavaa soorluttaaq Savalimmiut Issittumi periusissiani nutaaq aamma saqqummiuttussaagaa.

Ataatsimiinnermi nunat 50-it sinnerlugit inuillu 1000-it sinnerlugit peqataapput.

AAMMA ATUARUK Arctic Circle Issittumi suleqatigiinnissamut pingaaruteqartoq

Inatsisartuni Nunanut Allanut Sillimaniarnermullu Ataatsimiititaliaani siulittaasoq, Sofia Geisler (IA) ataatsimiinnermi peqataasut ilagaat.

- Ulloq siullerpaami naatsorsuutigeriikkattuut paasissutissanik tuniorarneq annertooq pivoq, malinnaaniarnartorujussuuvoq.

- Tamaasali malinnaaffigisinnaanngilagut piffissaataatit ingerlanerani arlariiallutik ilai ingerlagamik, Sofia Geisler ippassaq unnukkut radioaviisimut oqarpoq.

Savalimmiut EU-llu issittoq pillugu periusissiaq saqqummiunniaraat

Taanna ulluni sisamani peqataareerluni nunatsinnut uteruni assigiinngitsunik angerlaassassaqarpoq.

- Ullumikkut oqaluuserineqartut annertuut ilagivaat niuernerup annertusaneqarnissaa taavalu aamma avatangiisinut innarliinngitsumik inuussutissarsiutinik inerisaanissaq aammalu piujuartitsineq tunngavigalugu nunat eqqartueqataapput ingerlatsinissaq qanoq pingaaruteqartiginera. Tassa akisussaaqataaneq nungusaataannginneq innarliinnginnissarlu oqaatsit atorneqartut qiterisorujussuuvaat, Sofia Geisler oqarpoq.

EU-p ataatsimiinnermi issittoq pillugu periusissiani saqqummiunniarpaa, Savalimmiut issittoq pillugu periusissiani nutaaq aamma saqqummiunniarpaa.

- Maluginiagara unaavoq issittup pillugu periuusissiassatut eqqasaamminnut atatillugu avatangiisinut akornutaanngitsut innarliissutaanngitsullu inerisarneqarnissaa qitiutittorujussuugaat, taamaattumik suliassaqarpugut taakkua qanoq iliornerat aamma tusarnaassallugu isumassarsiorfiginngitsoorniannginnatsigut.

Nunanut Allanut Sillimaniarnermullu Tunngasunut Ataatsimiititaliami siulittaasup tullia, Doris J. Jensen (S) Issittoq pillugu ataatsimeersuarnermi aamma peqataavoq.

- Marluulluta oqaloqatigiissutigisagut annertusiartorput, taamaammat angerlaassaqassaagut ataatsimiitsitaliamullu aamma apuutissavagut, Sofia Geisler oqarpoq.