Qujaukitsoq: Arctic Circle Issittumi suleqatigiinnissamut pingaaruteqartoq
Quebecimi ataatsimeersuarnerup ualimut ammarneqarnerani Vittus Qujaukitsoq peqataavoq, oqalugiarnerminilu Issittumi suleqatiminut ilaatigut kajumissaaruteqarpoq.
- Qanigisatsinnut sutigut tamatigut suleqatiginerulernissaamut aggersaavunga, Vittus Qujaukitsoq oqarpoq.
Canadami Arctic Circle Forumeqarnera, Islandimi oktobarimi Arctic Cirlemi ataatsimeersuartoqarneranut ilaavoq. Maannakkulli aaqqissuussineq minneruvoq Issittumilu ineriartortitsinermi, nunap ilaanut tunngatillugu ingerlatsineq aningaasaliisarnerlu pingaartumik sammineqarput.
AAMMA ATUARUK Arctic Circle Greenland Forum: Nunatta oqaluttuarisaanerani pingaarutilik
Vittus Qujaukitsoq naapertorlugu ataatsimeersuarneq, attaveqatigiinnerit nutarternissaannut nutaanillu siunissami atorneqarsinnaasunik attaveqalernissamut periarfissiivoq.
- Aningaasalersuisussaannaat tassani eqqarsaatiginngilakka, kisiannili nalinginnaasumik angallannikkut niuernikkut takornariaqarnikkut allarpassuartigullu susassareqatigiiffigisatsinnut soqutigisaqartut suliffeqarfiillu oqaloqatiginissaat periarfissaq manna atorlugu pilersaarutigigaara, Vittus Qujaukitsoq oqarpoq.
Quebecimi ataasinngornermi marlunngornermilu ataatsimeersuarneq pissaaq. Tassanilu inuiaqatigiit ineriartornerannut oqallinnissamut tunngatillugu ilinniartitaanermut, kultureqarnermut, ilimatusarnermut ilageeqarnermullu naalakkersuisoqarfimmi pisortaq Karl Kristian Olsen aamma peqataavoq.