AWG2016 AWG-mik ingerlatsisut Siumumit nersualaarneqartut
- Siumumit nuannaarutigaarput qujamasuutigalugulu kalaallit pikkorissut akisussaaffik annertooq tigusimammassuk, Siumut politikkikkut oqaaseqartartua Jens-Erik Kirkegaard oqarpoq, nangillunilu:
- Qujaniarfigaagut kajumissutsimik peqataasut suliniummut kivitsisussat. Suliniummut angisuumut Kalaallit pilersitsinissamut misilittagaqalerput, tamassilu tanngassimaarutigeqaatsigit, ajunnginnerpaamillu angusaqarnissassinnik kissaallusi, Jens-Erik Kirkegaard oqarpoq.
Issittormiut Nuummi unammiuaarnissaat timersorneriinnaanngitsoq taassuma erseqqissaatigaa, Arctic Winter Gamesip ingerlanerani kulturikkut pikialaartitsisoqartarnera eqqaasitsissutigalugu:
- Issittumi najugaqartuusugut siammasissumi avinngarusimasumilu najugaqariaaseqarpugut. Akuttusuuginnarmi issittormioqatigut taama amerlatigisut nunatsinnut tikilluaqqusinnaavagut, kisianni ikinngutigiilernerit nutaat ukiorpassuarni atasussat tunngavilerneqassapput, Jens-Erik Kirkegaard oqarpoq, imatullu naggasiilluni:
- Kalaallit unammiuaarnerni peqataasussat angusaqarluarnissaannik kissaappagut, Arctic Winter Gamesillu naleqartitai malugitissavagut tassaasut: Join Ataatsimiissusermit, Feel Alapernaassusermit aammalu Jump Sapiissusermit.
