Aviisimi allaatigisaq: Naalagaaffeqatigiit naleqassusiat - akornutissallu
Folketingimi sivisunerpaamik ilaasortaasimasoq Berthel Haarder, peqatigiiffimmilu Naalagaaffeqatigiinni siulittaasoq, ataatsimoorlutik aviisimi Kristlig Dagbladimi ullumi taama allaatigisaqarput.
Danmarkip Norgellu ukiut 200-t matuma siorna avissaarsimanerat kulturikkut annaasaqarfiusimasoq oqallissaarisut allaaseraat. Danmarkillu, Kalaallit Nunaata Savalimmiullu taamatut avissaassagaluarpata aamma tamanna annaasaqarfiussasoq oqaatigaat.
Naalagaafferannguanngorartarsinnaasut
Sakkutooqarnikkut annaasaqarfiussaaq, tamannalu assersuutigalugu Ruslandimit tiguniarneqarsinnaassalluni, taama allaaserisaqarput:
- Nunani avannarlerni peqatigiilluta nunarujussuit pigisavut isumagisinnaanngikkutsigit allat isumaginiarsarissavaat, taamaattoqassappallu naalagaafferannguakkuutaalissaagut - oqaluttuarisaanermilu allat assingalugit - allanit oqartussaaffigineqalissalluta.
AAMMA ATUARUK Naalakkersuisut siulittaasuat Naalagaaffeqatigiit Peqatigiiffiannit nersualaarneqartoq
Nauja Lyngep Bertel Haarderillu pisortat sullissineranni aporfiusinnaasut, pingaartumik kalaallit savalimmiormiullu Danmarkimut nuunnerminni aporfigisartagaasa, atorunnaarsinnissaannut suliniuteqarneq sukkatsisaqqullugu kaammattuutigaat. Danskit naalakkersuisuisa tamanna misissuiffigissallugu siornatigut neriorsuutigereerpaat.
Killeqarfiit aporfissaqarsinnaanerat ataqatigiilersitsinissatsinnut aporfiupput. Namminersornermillu aaqqiissuussinerit ajoraluartumik aporfissanik amerlanerusunik pilersitsisimapput, naalagaaffeqatigiinni nunat immikkoortut peqatigisamik eqqarsaatiginissaat puigortarmassuk, oqallissaaruteqarlutik taama allapput.