Avataq: - Upalungaarsimanerput atorsinnaanngilaq
![](/sites/default/files/styles/image_934x467/public/article_images/mikkel_myrup_1.jpg?itok=KbKlYkLJ)
Tamanna eqqarsaatigalugu siunissamilu annertuumik uuliarluertoqassappat, Nunatsinni maanna upalungaarsimanerput atorsinnaanngilaq. Aamma eqqarsaatigisariaqarpoq, Nunatta isorartunersuata pitsaasumik upalungaarsimanissarput ajornakusoortittarmagu.
Pinngortitaq pillugu suliniaqatigiiffimmi, Avatami siulittaasoq, Mikkel Myrup taama isumaqarpoq.
- Nunarsuatsinni tikikkuminaatsuni upalungaarsimanissaq ajornakusooqisoq, Nunatta eqqaani uuliarluertoqarnerata takutiinnarpaa, Mikkel Myrup oqarpoq.
Aamma atuaruk Tunumi uuliaarluertoqarsimanersoq ernumassutaasoq
Tasiilap avataani 350 kilometerisut avasitsigisumi uuliaarluarnerup takuneqaqqaarneraniit Issittumi Sakutooqarfiup nalunaarutiginninnissaanut sapaatip akunnera ataaseq ingerlavoq.
Tamanna ilinniutaasariaqartoq, Pinngortitaq pillugu nunarsuaq tamakkerlugu suliniaqatigiiffiup, WWF-ip qullersaa Gitte Seeberg, oqallissaarummik jp.dk-mi allappoq.
- Tunumi qanittukkut pisoq Kalaallit Nunaanni upalungaarsimanermut misiliutitut taaneqarsinnaavoq. Taama pisoqarnerata takutippaa upalungaarsimanerup qanoq inissisimanera. Suut pitsaanerusumik suliarineqarsinnaappat, nukiillu suut qanorlu annertutigisut atorfissaqartippavut, silallu qanoq innera aamma apeqqutaasartoq paasivarput, Gitte Seeberg oqallissaarummini allappoq.
Gitte Seebergip taama oqallissaarinera, Mikkel Myrupip isumaqatigaa.
- Nunatsinni ajutoortoqartillugu upalungaarsimanermut tunngasut suli annikippallaarput, naak politikerit atorfillillu oqartaraluartut pitsaasumik upalungaarsimaneq eqqarsaatigalugu piareersimasugut.
Mikkel Myrup oqarpoq imalu nangilluni.
- Upalungaarsimanitta pitsaalluinnarneranik oqartarneq politikerinit atorfilinnillu mianersuunneqartariaqarpoq. Upalungaarsimanissarput taamatullu ajutoortoqartillugu piareersimanissarput pingaaruteqarpoq kisiannili tamanna soorlu pappialaannartigut takuneqarsinnaasoq tamannalu ajutuuvittoqartillugu soorunami atorsinnaanngilaq.
Aamma atuaruk Tunup avataani uuliaarluertoqarsimaneranik siumugaqartoqanngilaq
Nunatsinni avatangiisit pillugit suliniaqatigiiffimmi, Avatami siulittaasoq, Mikkel Myrup taama oqarpoq.
Avatangiisit pillugit Naalakkersuisoq, Mala Høy Kúko oqaaseqartinniaraluarparput ataatsimiittoqarnerali pillugu oqaaseqartissinnaanatigu.