Tunup avataani uuliaarluertoqarsimaneranik siumugaqartoqanngilaq
Thomas Bruun De Neergaard Issittumi sakkutooqarfimmeersoq KNR-imut taama oqarpoq.
Europap Nunattalu imartaannik qaammataasakkortumik nakkutilliivik Clean Sea Net uuliaarluertoqarsimasorisaminik aggustip qulingani takusaqarpoq. Tamannalu aalisariutinit nunatsinneersunit sumiiffimmiittunit aamma uppernarsarneqarpoq, kingornalu Issittumi sakkutooqarfiup umiarsuaq alapernaarsuut Knud Rasmussen sumiiffimmukartippaa uuliaarluernermit misiligutissamik tigusitinniarlugu.
AAMMA ATUARUK Tunup avataani uuliaarluertoqarsimasinnaanera suli paasisaqarfigineqanngilaq
Umiarsuarli uuliaarluernermik siumugaqanngilaq, sumiiffimmilu silarlunnera, naqitsiniisaffik anorersuartalik, anori sekundimut 20-30 meterisut sukkatigisoq mallillu 10 meterisut portutigisut pissutaasinnaanasorineqarpoq. Sumiiffinnimi nillernerusuni uuliaarluerneq sumiiffinnut kiannerusunut naleqqiullugu arriinnerusumik nungukkiartortarpoq.
Anorersuup uuliakoorneq siaruarsimavaa
Issittumi sakkutooqarfik qaammataasakkut nakkutilliivimmit Clean Sea Nettimit assilisanik amerlanerusunik aggustip 14-ianit 15-ianit 17-ianeersunillu pissarsisimavoq, sumiiffimmi uuliakoortoqarsimaneranik ersersitsinngitsunik.
- Issittumi sakkutooqarfiup naliliinera malillugu Tunup imartaani uuliakoortoqarsimavoq. Qaammataasakkut assilisat aalisariutiniillu assilisat tunngavigalugit uuliakoortoqarsimaneranit mingutsitsisoqarsimasoq nalilerneqarpoq.
- Issittumi sakkutooqarfiup nalilerpaa uuliakoorfiusimasup anorersuarnerani uulia siaruarsimasoq nassaassaajunnaarlunilu, tusagassiutinut nalunaarumminni nalunaarput.
Taamaattumik Issikkumi sakkutooqarfiup sumiiffimmi ujarlernertik unitsippaat, umiarsuarlu alapernaarsuut Knud Rasmussen suliani allat uterfigeqqillugit