Tunup avataani uuliaarluertoqarsimasinnaanera suli paasisaqarfigineqanngilaq
Issittumi Sakkutooqarfimmi Nuummiittumi Imaanut Avatangiisinullu tunngatillugu officeri Nils Westergaard, ullaaq manna oqaluttuarpoq Illersornissaqarfiup timmisartua sumiiffimmukartinneqartoq pasinarsinnaasunik takusaqarsimanngitsoq.
- Sumiiffimmi sila maanna unerisimanngitsupilussuuvoq malissuit meterit arfinillit qulillu akornanni portussuseqarlutik, taamaattoqarneranilu takusaqaruminaappoq, Nils Westergaard KNR-imut ullaaq manna taama oqarpoq.
AAMMA ATUARUK Tunumi uuliaarluertoqarsimanersoq ernumassutaasoq
- Aamma qaammataasamit assilisanut pissarsiareqqammisatsinnut tamanna atuuppoq. Pasinarsinnaasunik takutitsinngillat, timmisartumik alapernaarsuinertulli ipput. Taama mallertigitillugu qaammataasamit assilissatigut uuliaarluertoqarsimaneranik takusaqartoqarsinnaanngilaq.
- Aalisariutilli imaani simernermik taartumik takusaqarsimallutik kalerriutaat upperaagut, aamma uuliaasimanissaa ilimagaarput - annertuujunersorli mikisuunersorluunniit oqaatigisinnaanngilarput, Issittumi Sakkutooqarfimmi Imaanut Avatangiisinullu tunngatillugu officeri Nils Westergaard taama oqarpoq.
Issittumi Sakkutooqarfiup sumiiffimmi silagissinissaa maanna utaqqineqarpoq, qaammataasamit assileeqqittoqarniassammat aammalu Illersornissaqarfiup timmisartua alapernaarsueqqissammat. Aammattaaq umiarsuaq alapernaarsuut Knud Rasmussen Tasiilap avataata kujammut-kangiatungaanut kilometerinik 3-400-nik ungasitsigisumut aqagu apuuttussaavoq.