Tunumi uuliaarluertoqarsimanersoq ernumassutaasoq
Qaammataasatigut nakkutilliissutip aggustip qulinganni uuliaarluersimasorisaq nalunaarutigisimagaa Nils Westergaardip Issittumi Sakkutooqarfimmeersup oqaatigaa.
- Kalerrisaarutaannaavoq, tappavanilu uuliaarluertoqarsimaneranik uppernarsaataanani, immami soqarneranik taamaallaat takusaqarpugut, Issittumi Sakkutooqarfimmeersoq Nils Westergaard oqarpoq.
Sinerissamik nakkutilliissut Knud Rasmussen aamma takunniffimmukartinneqarpoq, uuliaarluernerusimappat salinneqarsinnaanersoq nalilerneqassammat, suliassarlu eqqartuussivimmut suliassanngortinneqassagaluarpat uppernarsaatissamik tigusisoqarniassammat.
Issittumili Sakkutooqarfimmit silarlunnera pissutigalugu sikoqarpallaaneratalu kinguneranik uuliaarluerfiusorisap sinerissamik nakkutilliissummit tikinneqarsinnaannginnissaa ernumanartoqartinneqarpoq, tamatumami kinguneranik sinerissamik nakkutilliissutip aqagu aqaguaguluunniit apuussinnaanissaa kinguarsarneqarsinnaammat.
Aamma atuaruk Tasiilap avataani uuliaarluertoqarunartoq
Issittumi Sakkutooqarfiup uuliaarluersimasorineqartup qanoq annertutiginera qanorlu suliassaatiginera maanna paasinialerpaat:
- Qanoq annertuginera maanna paasiniassavarput, suli allamik peqarnersoq, annertunersoq imaluunniit annikinnersoq, timmisartumillu ullumi aallartitsilluta paasiniassavarput. Saniatigut qaammataasatigut nakkutilliissummit assinik amerlanernik qinnuteqarpugut, qanoq annertutiginersoq takuniassagatsigu.
Uuliaarluertoqarsimaneralu qulakkeerneqareerpat qanoq iliortoqarnissaa aatsaat aalajangiunneqassaaq.
- Uuliarluerneq annertuppat, soorunami tamanna tunngavigalugu iliuuseqassaagut, annikinneruppat qanoq iliuuseqarfigisinnaanerlugu takussavarput. Kisianni kingorna aatsaat taakku tunngavigalugit aalajangiussissaagut, Issittumi Sakkutooqarfimmeersoq Nils Westergaard taama oqaluttuarpoq.
